पुणे : पुणे पोलिसांकडून वर्षाला सरासरी साडेतीनशे मद्यपी वाहनचालकांवर कारवाई करण्यात आली आहे. मात्र, शहरात ३६ लाखांहून अधिक वाहनसंख्या असून, शेकडो बार आणि पबमध्ये हजारोंच्या संख्येने तरुण मद्यपान करतात आणि वाहने चालवतात. या प्रमाणात कारवाईची आकडेवारी पाहिल्यास केवळ दिखावा असल्याचेच स्पष्ट होते. गेल्या अडीच वर्षांत केवळ एक हजार ७८ मद्यपी वाहनचालकांवर कारवाई करण्यात आली आहे. कल्याणीनगरमध्ये भरधाव अलिशान कारने धडक दिल्याने दुचाकीवरील अभियंता तरुण आणि तरुणीचा जागीच मृत्यू झाल्याची घटना घडली. अल्पवयीन मुलगा अपघातग्रस्त कार चालवित होता. त्याने मद्यप्राशन केल्याचे प्रत्यक्षदर्शी आणि पोलिसांनी सांगितले. या अपघातानंतर शहरात फोफावलेली पब संस्कृती आणि मद्यपी वाहनचालकांमुळे होणाऱ्या अपघातांचा प्रश्न ऐरणीवर आला आहे. त्या पार्श्वभूमीवर शहर पोलिस व वाहतूक पोलिसांनी मद्यपी वाहनचालकांवर केलेल्या कारवाईचा आढावा घेतल्यावर निराशाजनक चित्र दिसून आले. मद्यपी वाहनचालकांमुळे शहरात छोटे-मोठे अपघात होत असतात. अनेकदा त्यांची पोलिसांकडे नोंदही होत नाही. शहर पोलिसांकडे ब्रेथ अॅनालायझरची संख्या कमी असून, अनेकदा वाहतूक पोलिस वाहनचालकाच्या तोंडाचा वास घेऊन मद्यपान केले अथवा नाही, याची खात्री करतात.
शहरात कोरेगाव पार्क, कल्याणीनगर, बाणेर, कोंढवा आणि पुणे स्टेशन परिसरात पबची संख्या मोठी आहे. तरुण मोठ्या संख्येने पबमध्ये जातात, तेथे मद्यपान करतात. हे चित्र सर्रास दिसते. मात्र, पोलिसांनी २०२२ मध्ये केवळ ३७ मद्यपी वाहनचालकांवर कारवाई केली असून, २०२३ मध्ये ५६२ वाहनचालकांवर आणि चालू वर्षात आतापर्यंत ४७९ वाहनचालकांवर कारवाई केली आहे. मद्यपी वाहनचालकांना पोलिसांची भिती राहिलेली नाही. शहरात केवळ ३१ डिसेंबरच्या रात्री पोलिसांकडून मद्यपी वाहनचालकांवर कारवाईसाठी विशेष मोहीम राबवली जात असल्याचे साधारण चित्र असते. नवीन वर्षाच्या स्वागतासाठी पार्ट्यांना जाणाऱ्यांच्या तोंडी पोलिस कारवाईची चर्चा असते. मात्र, एरवी कशाचीही भिती नसते. त्यामुळे ‘ड्रंक अँड ड्राइव्ह’ची कारवाई ३१ डिसेंबर पुरतीच मर्यादित असते का, असा प्रश्न उपस्थित होतो. शहरात अनेक मोक्याच्या ठिकाणी वाहतूक पोलिस नियमन करतानाही दिसून येत नाहीत. मात्र, मध्यवस्तीपासून उपनगरापर्यंत सर्वत्र नो-पार्किंगमधील वाहनांवर ‘टोइंग’ची कारवाई करण्यावरच वाहतूक पोलिसांचे सर्वाधिक लक्ष असते, असे पोलिसांनी केलेल्या वाहतूक नियमभंग कारवाईच्या आकडेवारीवरून स्पष्ट होते. ‘टोइंग’ची कारवाई करताना वाहतूक पोलिस आवश्यकता नसलेल्या ठिकाणची वाहनेदेखील उचलून नेतात. मात्र, आवश्यकता असलेल्या ठिकाणी कारवाईला प्राधान्य दिले जात नाही.
मद्यपी वाहनचालकांवर झालेली कारवाई
वर्ष केसेस
२०२२ ३७
२०२३ ५६२
२०२४ ४७९
अल्पवयीन मुलांवर झालेली कारवाई
वर्ष गुन्हे
२०२३ ४८
२०२४ २६