मुंबई : दिवस-रात्र मेहनत करून कुटुंबाचा उदरनिर्वाह करणाऱ्या पालिकेतील एका कंत्राटी कामगाराला एक ज्योतिषी भेटला. हात पाहिल्यावर, ‘तुला ईडापिडा सतावत असून बरकतीसाठी तीन पूजा कर’ असा सल्ला त्याने दिला. घरी येऊन दोन पूजा केल्या आणि तिसऱ्या पूजेला हा ज्योतिषी कामगाराकडचे सहा लाखांचे दागिने घेऊन फरार झाला. अँटॉप हिल येथे वास्तव्यास असलेला मंगेश पालिकेत कंत्राटी कामगार म्हणून नोकरी करतो. मुलींसाठी दुकानावर खाऊ आणायला गेला असताना त्याला एक दाम्पत्य भेटले. त्यांनी आपण हात पाहून भविष्य सांगत असल्याचे मंगेशला सांगितले. यासाठी किती खर्च येईल अशी विचारणा मंगेशने केली. केवळ ३० रुपयांत तुझे भविष्य सांगतो, असे हे दोघे म्हणाले. फक्त ३० रुपयांत भविष्य जाणून घेण्याची संधी असल्याने मंगेशने होकार दिला. दोघांनाही घेऊन मंगेश घरी गेला. ज्योतिषाने मंगेशचा हात पाहिला आणि ‘तू मेहनत घेतोस मात्र तुझ्या आयुष्यात बरकत येत नाही. तुला ईडापिडा सतावत आहे’ असे या ज्योतिष्याने सांगितले. ईडापिडा घालविण्यासाठी काय करावे लागेल अशी विचारणा मंगेश याने करताच, यासाठी पूजा घालावी लागेल आणि त्यासाठी दीड हजार रुपये खर्च येईल, असे त्याने सांगितले. मंगेश याने पूजा करण्याची तयारी दर्शवली आणि पूजा करण्यास दीड हजार रुपये दिले. ही पूजा एकदाच नसून तीनदा घालावी लागेल, असे या दाम्पत्याने सांगितले.
दोनच दिवसांनी भविष्य सांगणारा आणि त्याच्याबरोबर असलेली महिला घरी आली त्यांनी पूजा अर्चा केली आणि निघून गेले. दुसऱ्यांदा देखील त्यांनी तेच केले आणि तिसऱ्यांदा महिला न येता ज्योतिषी एकटाच आला. त्याने पूजा सुरू केली आणि मंगेशला, ‘तू या पूजेच्या वेळी घरात थांबू नकोस’ असे सांगितले. त्यानुसार मंगेश इमारतीखाली जाऊन उभा राहिला. ही संधी साधत ज्योतिषाने मंगेशच्या पत्नीला घरातील सर्व दागिने आणण्यास सांगून ते पूजेजवळ ठेवले. कपड्याचे एक गाठोडे केले आणि त्यामध्ये हे दागिने बांधले. ‘नऊ दिवसांनी हे गाठोडे उघडा, तुमची भरभराट होईल’ असे तो म्हणाला. या पूजेनंतर ज्योतिषाने सांगितल्याप्रमाणे मंगेश आणि त्याची पत्नी मंदिरात जाऊन आली. मंगेशने पत्नीला गाठोड्याबाबत विचारला असता त्यामध्ये दागिने बांधून ठेवले असल्याचे ती म्हणाली. मंगेशला संशय आल्याने त्या गाठोडे उघडून पहिले असता आतमध्ये दागिने नव्हते. ज्योतिषाला फोन लावला असता त्याचा मोबाइल बंद येत होता. फसवणूक झाल्याचे लक्षात आल्याने पती-पत्नी दोघांनीही कपाळावर हात मारुन घेतला. मंगेशने याबाबत पोलिस ठाण्यात तक्रार केली.