पिंपरी : गुन्हेगारी टोळ्यांच्या बिमोडासाठी पिंपरी-चिंचवड पोलिसांनी कंबर कसली असून, गेल्या पाच वर्षांत १०२ गुन्हेगारी टोळ्यांवर ‘महाराष्ट्र संघटित गुन्हेगारी नियंत्रण अधिनियमा’न्वये (मकोका) कारवाई केली आहे. चालू वर्षात ३९ गुन्हेगारी टोळ्यांवर ‘मकोका’ची कारवाई करण्यात आली. विनयकुमार चौबे यांनी १४ डिसेंबर २०२२ रोजी पोलिस आयुक्त म्हणून पदभार स्वीकारला. त्यानंतर वर्षभरात विविध उपाययोजना केल्या. त्यांच्या प्रयत्नांमुळे गुन्हेगारी कमी होण्यास मदत झाली. शस्त्रे घेऊन राडा घालणारी टोळकी; तसेच खंडणी, अपहरण यासारखे गंभीर गुन्हे करणाऱ्या सराईतांच्या मुसक्या त्यांनी आवळण्यास सुरुवात केली. त्यासाठी गुन्हे शाखेच्या विविध पथकांसह पोलिस ठाण्यांच्या तपास पथकांना सक्रिय केले. त्यामुळे गुन्ह्यांची उकल होऊन गुन्हेगार गजांआड होण्याचे प्रमाण वाढले.
पिंपरी-चिंचवड पोलिस आयुक्तालयांतर्गत २०२२ पर्यंत ६३ टोळ्यांवर ‘मकोका’अंतर्गत कारवाई करण्यात आली होती. आयुक्त चौबे यांनी अशा टोळ्यांना दणका देऊन कारवाईचा धडाका लावला. पोलिस ठाणे निहाय सराईत गुन्हेगारांची यादी तयार करण्यात आली. त्यामध्ये विशेषतः मावळातील गुन्हेगारी टोळ्यांचा समावेश आहे. मावळात काही वर्षांपूर्वी खून आणि खुनाच्या प्रयत्नांच्या घटनांनी डोके वर काढले होते. त्यामुळे पोलिसांनी या भागातील आठ गुन्हेगारी टोळ्यांना ‘मकोका’ लावून ७३ गुन्हेगारांवर कारवाई केली. त्यामुळे मावळ तालुक्यातील गुन्हेगारीचे कंबरडे मोडण्यात पोलिसांना यश आले.
जामिनावर बाहेर आलेले सराईत गुन्हेगार पुन्हा गुन्हेगारी कृत्यांकडे वळतात. त्याला आळा घालण्यासाठी पोलिसांनी त्यांच्यावर नजर ठेवण्यास सुरुवात केली. त्यांचे सोशल मीडिया अकाउंट, डीपी, प्रोफाइल, कमेंट यावरही पोलिसांनी बारीक नजर ठेवली आहे. त्यामुळे सोशल मीडियातून दहशत पसरविणाऱ्यांवरही कारवाई होत आहे. संघटित गुन्हेगारी रोखण्यावर आमचा भर आहे. त्यामुळे कायदा व सुव्यवस्था राखण्यास मदत होत आहे. यापुढेही अशा गुन्हेगारी टोळ्यांवर ‘मकोका’ची कारवाई सुरूच राहणार आहे.– विनयकुमार चौबे, पोलिस आयुक्त, पिंपरी-चिंचवड
पिंपरी-चिंचवड पोलिसांची ‘मकोका’ कारवाई
वर्ष टोळ्यांची धरपकड गुन्हेगारांची धरपकड
२०१८ १ ७
२०१९ ९ ५९
२०२० ९ ५०
२०२१ २६ १८७
२०२२ १८ १२९
२०२३ ३९ २९३
मावळातील यंदाची ‘मकोका’ कारवाई
पोलिस ठाणे टोळ्यांची धरपकड गुन्हेगारांची धरपकड
तळेगाव ४ ४८
शिरगाव २ १३
देहूरोड १ ५
तळेगाव १ ७
