मुंबई : ऑनलाइन अॅप्सच्या माध्यमातून चालविण्यात येणाऱ्या सेक्स रॅकेटचा वर्सोवा पोलिसांनी पर्दाफाश केला आहे. या प्रकरणात पोलिसांनी तनिषा कनोजिया, रुद्र राऊत आणि तमन्ना खान या तीन आरोपींना अटक केली आहे.
तनिषा ही ऑनलाइन अॅपच्या माध्यमातून हे सेक्स रॅकेट चालवत होती. तिने साथीदारांच्या मदतीने यासाठी प्ले स्टोअरवर एक अॅप जारी केले होते. हे अॅप डाउनलोड केल्यावर त्याच्या वापरकर्त्यांना १ हजार रुपये ते ६२ हजार रुपयांचे कॉइन खरेदी करावे लागत. त्यानंतर या वापरकर्त्याला एक लिंक प्राप्त होत असे. या लिंकद्वारे ऑनलाइन लाइव्ह सेक्स व्हिडिओ दाखविले जात होते. दरदिवशी अर्ध्या तासाचे व्हिडिओ या अॅपद्वारे दाखविले जात होते. तसेच या अॅपकडे ग्राहकांना आकर्षित करण्यासाठी त्याची इंस्टाग्राम या जाहिरात केली जात होती. याबाबत वर्सोवा परिसरात एक जण ऑनलाईन अप्सच्या माध्यमातून सेक्स रॅकेट चालवत असल्याची माहिती खबऱ्यांकडून पोलिसांना मिळाली. त्यानुसार वरिष्ठ निरीक्षक गणेश पवार यांच्या पथकातील पोलीस निरीक्षक सचिन शिर्के, पोलिस उपनिरीक्षक मनोज हावळे, नागेश मिसाळ, महिला उपनिरीक्षक अर्चना कोळी यांच्या पथकाने तपास सुरु केला. पोलिसांनी तनिषाच्या घरी छापा मारला असता यावेळी ते तिघे अश्लील कृत्य करत असल्याचे पोलिसांना आढळून आले. पोलिसांनी त्या तिघांना ताब्यात घेऊन त्यांच्याविरोधात गुन्हा दाखल केला आहे.
दरम्यान काही वर्षांपूर्वी तमन्नाची तनिषा सोबत ओळख झाली. त्या ओळखीनंतर झटपट पैसे कमवण्यासाठी रुद्रच्या मदतीने ते गेल्या वर्षभरापासून ऑनलाईन सेक्स रॅकेट चालवत होते, अशी माहिती तपासातून समोर आल्याचे पोलिसांनी सांगितले.
