पुणे : मॅचविनिंग खेळी कशी असावी, याचा उत्तम वस्तुपाठ विराट कोहलीने यावेळी दाखवून दिला. रोहित शर्मा बाद झाल्यावर कोहलीने सामन्याची सूत्रे आपल्या हातात घेतली. कोहलीने यावेळी धडाकेबाज अर्धशतक झळकावले आणि त्याच्या जोरावर भारताने विजयाचा चौकार फटकारला. कोहलीने यावेळी नाबाद १०३ धावांची खेळी साकारली. बांगलादेशच्या २५८ धावांचा पाठलाग करताना रोहित शर्माने भारताला झोकात सुरुवात करून दिली. रोहितने यावेळी सात चौकार आणि दोन षटकारांच्या जोरावर ४८ धावांची भन्नाट खेळी साकारली. रोहित बाद झाला आणि कोहली मैदानात आला. कोहलीने सुरुवातीपासूनच हा सामना आपल्या हातात कसा राहील हे पाहिले. एकाच चेंडूत त्याने १२ धावांची लूट केली. कोहलीला यावेळी शुभमन गिलची चांगली साथ मिळाली. गिलने यावेळी पाच चौकार आणि तीन षटकारांच्या जोरावर ५३ धावांची खेळी साकारली. गिल बाद झाला आणि त्यानंतर काही वेळातच श्रेयस अय्यरही तंबूत परतला. या परिस्थितीत बांगलादेशचा संघ सामन्यात पुनरागमन करू शकत होता. पण कोहलीने यावेळी अर्धशतक झळकावले आणि त्यामुळे बांगलादेशला या सामन्यात भारतावर वचक ठेवता आला नाही.
बांगलादेशने टॉस जिंकला आणि प्रथम फलंदाजीचा निर्णय यावेळी घेतला. बांगलादेशचा कर्णधार शकिब अल हसन या सामन्यात खेळू शकला नाही. पण बांगलादेशने यावेळी ९३ धावांची दमदार सलामी दिली होती. त्यामुळे बांगलादेशचा संघ यावेळी मोठी धावसंख्या उभारणार असे वाटले होते. पण त्यानंतर भारतीय संघाने या सामन्यात झोकात पुनरागमन केले आणि बांगलादेशच्या धावसंख्येला खीळ बसवली. बांगलादेशचा सलामीवीर तांझिद हसनने यावेळी अर्धशतक झळकावले होते. पण त्यानंतर लगेचच कुलदीप यादवने त्याला बाद केले आणि भारताला पहिले यश मिळवून दिले. हसन यावेळी ५१ धावांवर बाद झाला. त्यानंतर रवींद्र जडेजाने अफलातून गोलंदाजीचा स्पेल टाकला आणि भारताला दोन विकेट्स मिळवून दिले. जडेजाने यावेळी प्रथम कर्णधार नजमुल होसेन शांतोला ८ धावांवर बाद केले. त्यानंतर भारताच्या विजयाच्या मार्गात मोठा अडसर बनस होता तो लिटन दास. कारण दासने अर्धशतक झळकावले होते आण तो शतकाच्या दिशेने कूच करत होते. पण जडेजाने यावेळी त्याला ६६ धावांवर बाद केले आणि तिथून भारताच्या बाजूने हा सामना झुकायला सुरुवात झाली. त्यानंतर बांगलादेशच्या एकाही खेळाडूला अर्धशतकापर्यंत पोहोचता आले नाही आणि भारताने त्यांच्या धावांची बोलती यावेळी बंद केली. त्यामुळे बांगलादेशच्या संघाला या सामन्यात भारतापुढे २५७ धावांचे आव्हान ठेवता आले. पण हे आव्हान भारतासाठी नक्कीच पुरेसे नव्हते.
