डोंबिवली : सिद्धू मुसेवाला हत्याकांडात सहभागी असलेल्या तसेच अभिनेता सलमान खान यांना ठार मारण्याची धमकी देणाऱ्या बिश्नोई गँगकडून डोंबिवलीतील एका बिल्डरला धमकी देण्यात आली होती. बिल्डरला जीवे ठार मारण्याची धमकी देणाऱ्या दोघांना डोंबिवली ग्रामीण परिसरात सापळा रचून रामनगर पोलिसांनी बेड्या ठोकल्या आहेत. आकाश रमेश गिरी (वय २३. रा. तांबोळी नगर, डोंबिवली पूर्व) इंद्रजित राजाराम यादव (वय ३० वर्षे रा. धनश्री चाळ, पिसवली, कल्याण पूर्व ) अशी अटक केलेल्या आरोपीची नावे आहेत. पोलिसांनी दिलेल्या माहितीनुसार, आदीमाया इंटरप्रायजेस, बिल्डर्स ॲण्ड डेव्हलपर्स या कंपनीचे मालक प्रशांत विठ्ठल जाधव ( वय ३९) हे बांधकाम व्यसायिक असून त्यांना त्यांच्या मोबाईलवर १३ ऑक्टोबर रोजी रात्री ११:४५ वा. सुमारास धमकी देण्यात आली होती. फोन कॉल व व्हॉट्सॲप मेसेजेसव्दारे आरोपी आकाश गिरीचे नावाने फोन मेसेज पाठवुन ‘तु इंद्रजित यादव याचे पैसे त्याला दे नाहीतर तुझी मर्डर करतो’ अशी जीवे ठार मारण्याची धमकी दिली.
त्या बाबत तक्रारदार जाधव यांनी रामनगर पोलीस ठाण्यात भा.द.वि.क. ५०६(२) प्रमाणे १४ ऑक्टोबर रोजी तक्रार दाखल केली. तक्रारीत लॉरेंस बिश्नोई गँगचे नाव आल्याने पोलिसांनी घटनेचे गांभीर्य ओळखून सदर गुन्ह्याचा तपास पोलीस उपनिरीक्षक केशव हासगुळे आणि त्यांचे पथक करत असतानाच गुन्ह्यातील फिर्यादीमध्ये आरोपीने ज्या मोबाईलद्वारे धमकी दिली त्या मोबाईल धारक आरोपीचा तांत्रिक माहितीच्या आधारे आरोपींचे नाव निष्पन्न केले. दरम्यान, पोलीस पथकाने कसोशीने शोध घेवून डोंबिवली ग्रामीण भागात सापळा रचून दोन्ही आरोपींना ताब्यात घेतले. त्यानंतर त्यांच्याकडे अधिक चौकशी केली असता, आरोपी आकाश गिरी हा तक्रारदार जाधव यांच्याकडे यापूर्वी कामाला असल्याचे समोर आले. या दोघांनी दारू पार्टी करून जाधव यांच्याकडे पैशांची मागणी करत त्यांना जीवेठार मारण्याची धमकी दिल्याचे निष्पन्न झाल्याने दोघांना अटक केल्याची माहिती वरिष्ठ पोलीस निरीक्षक नितीन गिते यांनी दिली आहे.