नवी मुंबई : सिडकोच्या प्रशासन विभागाच्या महाव्यवस्थापकाला एका इस्टेट एजंटकडून १० हजार रुपये लाच स्वीकारताना पकडण्यात आल्याने सिडको वर्तुळात खळबळ उडाली आहे. जगदीश लक्ष्मणराव राठोड (५३) असे या अधिकाऱ्याचे नाव असून सदनिकेच्या ‘फर्स्ट पार्टी डीड ऑफ ॲग्रिमेंट’ वर स्वाक्षरी करण्यासाठी त्यांनी लाच स्वीकारल्याचे उघडकीस आले आहे. लाचलुचपत प्रतिबंधक विभागाच्या नवी मुंबई युनिटने सिडको कार्यालयात ही कारवाई केली. राठोड हे सिडकोच्या प्रशासन विभागाचे महाव्यवस्थापक म्हणून कार्यरत होते. त्यांच्याकडे ऐरोली विभागाचा अतिरिक्त कार्यभार सोपविण्यात आला होता. त्यामुळे ऐरोली विभागातील सिडकोची कामे राठोड यांच्याकडे होती. काही दिवसांपूर्वी एका इस्टेट एजंटने ऐरोली येथील सदनिकेचे ‘फर्स्ट पार्टी डीड ऑफ ॲग्रिमेंट’ करण्यासाठी सिडकोच्या ऐरोली येथील विभाग कार्यालयात कागदपत्रे सादर केली होती. या कागदपत्रांवर स्वाक्षरी करण्यासाठी जगदीश राठोड यांनी १० हजार रुपये लाचेची मागणी केली होती. त्यामुळे इस्टेट एजंटने नवी मुंबई लाचलुचपत प्रतिबंधक विभागाकडे तक्रार केली होती. त्याअनुषंगाने पडताळणी केली असता, त्यात तथ्य आढळून आले.
राठोड यांनी लाचेची रक्कम सिडकोच्या सीबीडी बेलापूर येथील कार्यालयात स्वीकारण्याचे कबूल केले. त्यानुसार, नवी मुंबई लाचलुचपत प्रतिबंधक विभागाचे पोलिस उपअधीक्षक शिवराज म्हेत्रे व त्यांच्या पथकाने सिडकोच्या कार्यालयात सापळा लावला होता. यावेळी राठोड यांनी सिडकोच्या सहाव्या मजल्यावरील प्रशासन विभागाच्या कार्यालयात इस्टेट एजंटकडून १० हजार रुपये स्वीकारल्यानंतर लाचलुचपत प्रतिबंधक विभागाच्या पथकाने त्यांना पकडले.