ठाणे : प्रधानमंत्री मुद्रा योजनेतून कमी व्याज दरात कार मिळवून देण्याचे प्रलोभन दाखवून एकाने अनेकांना आर्थिक गंडा घातल्याचा प्रकार ठाण्यात समोर आला आहे. आतापर्यंत २३ जणांची २७ लाख ३१ हजारांची फसवणूक झाली असून या प्रकरणी राबोडी पोलिस ठाण्यात गुन्हा दाखल झाला आहे. ठाण्यातील कार्यालय बंद करुन आरोपी पसार झाला असून पोलिसांकडून आरोपीचा शोध घेण्यात येत आहे. मुंबईतील सांताक्रुज येथे वास्तव्यास असलेले अमित (तक्रारदाराचे नाव बदलले आहे) चालकाचे काम करतात. त्यांना व्यवसायासाठी कार खरेदी करायची होती. त्याचदरम्यान अमित यांना समाजमाध्यमावर एक जाहिरात दिसली. प्रधानमंत्री मुद्रा योजनेतून कर्ज मिळवून कमी व्याजदरात व्यवसायासाठी कार देण्याची ही जाहिरात होती. या जाहिरातीला भूलून अमित यांनी कार घेण्याचे निश्चित केले. याबाबत चौकशीसाठी ते ठाण्यातील कॅडबरी सिग्नलजवळ ऑटोमोबाइलच्या कार्यालयात आले. त्यावेळी कार्यालयात बसलेल्या आरोपीने कारच्या बुकिंगसाठी ११ हजार रुपये भरण्यास सांगितल्याने अमित यांनी तत्काळ ऑनलाइनद्वारे पैसे पाठवले. नंतर आरोपीने काही कागदपत्रांवर सह्या घ्यायच्या सांगून अमित यांना परत फोन करून कार्यालयात बोलावून घेतले. आरोपीने कर्जाच्या संदर्भात कागदपत्रांवर सह्या घेतल्या आणि त्यांच्याकडून आणखी २५ हजार रुपये उकळले. या सर्व प्रक्रियेनंतर आरोपीने अमितला गाडी शोरूमला येणार आहे. विम्यासाठी २० हजार रुपये पाठवण्यास सांगितले. अमित यांनी हे पैसेही आरोपीला ऑनलाइनद्वारे पाठवले. आठ ते दहा दिवसानंतर आरोपीने अमित यांना खार येथील एका बँकेच्या शाखेत कागदपत्रांची पडताळणी करण्यासाठी बोलवले. त्यानुमार अमित बँकेतही जाऊन आले.
पुन्हा आरोपीने अमित यांना फोन करुन गाडी शोरूमला आल्याचे सांगत बँकेमध्ये चेसीस आणि इंजिन नंबर द्यावा लागतो, त्यासाठी एक लाख रुपये भरावे लागतील, असे सांगितले. अमित यांच्याकडे इतके पैसे नसल्याने त्यांनी ४४ हजार रुपये ऑनलाइनद्वारे आरोपीला पाठवले. अमित यांच्याकडून एक लाख रुपये उकळल्यानंतर आरोपीने त्यांना प्रधानमंत्री मुद्रा योजनेंतर्गत ७ लाख २५ हजार रुपये कर्ज मंजूर झाल्याचे सांगत ६९ हजार रुपये घेतले. अमित यांनी गाडीविषयी विचारणा केल्यानंतर लवकर गाडी मिळेल असे आश्वासन दिले. मात्र, आरोपीने ते पूर्ण केले नाही. पैसेही देण्यास तो टाळाटाळ करू लागल्याने अमित आरोपीच्या ठाण्यातील कार्यालयात आले. पैशाची मागणी केल्यानंतर आरोपीने त्यांना एक धनादेश दिला. मात्र, तो धनादेश वटला नाही. तसेच, आरोपीचा फोनही बंद येऊ लागला. नंतर आरोपी कार्यालय बंद करून पसार झाला. आरोपीने अमित यांच्यासह अन्य २२ जणांना प्रधानमंत्री मुद्रा योजनेतून कार मिळवून देण्याचे प्रलोभन दाखवून फसवणूक केली आहे. तक्रारदारांची संख्या आणखी वाढण्याची शक्यता आहे.
