पुणे : लक्ष्मी रस्त्यावरील एका नामवंत सराफी पेढीत हिरेजडीत दागिने खरेदी करणाऱ्या महिलेची तीन कोटी ४८ लाख ८५ हजार रुपयांची फसवणूक केल्याचा प्रकार उघडकीस आला आहे. सराफी पेढीतील कर्मचाऱ्यांनी बाजारभावापेक्षा जास्त किंमत लावून महिलेची दागिने खरेदी व्यवहारात फसवणूक केली. या प्रकरणी कर्मचाऱ्यास अटक करण्यात आली आहे. या प्रकरणी सराफी पेढीतील कर्मचारी चेतन विसपुते याला अटक करण्यात आली असून, संगीता महाजन, तेजल पवार, अमोल मोहिते, सागर धोंडे, चंदन गुप्ता, धवल मेहता, हितेश पुनमिया यांच्याविरुद्ध गुन्हा दाखल करण्यात आला आहे. याबाबत ४६ वर्षीय महिलेने विश्रामबाग पोलिस ठाण्यात फिर्याद दिली आहे.
तक्रारदार महिला लोणी काळभोर भागात राहण्यास आहे. महिलेच्या पतीचा पेट्रोल पंप तसेच अन्य व्यवसाय आहेत. लक्ष्मी रस्त्यावरील एका नामवंत आणि देशभरात साखळी असलेल्या सराफी पेढीच्या त्या ग्राहक आहेत. डिसेंबर २०१८पासून त्यांनी सराफी पेढीतून वेळोवेळी चार कोटी १९ लाख रुपयांचे हिरेजडित दागिने खरेदी केले होते. महिलेने दागिने खरेदीवर सूट मागितली होती. नियमित ग्राहक असल्याने महिलेला खरेदीवर सूट देण्यात आली होती.
जानेवारी २०२३मध्ये महिला सराफी पेढीत गेली. त्या वेळी ‘जुने हिरेजडित दागिने बदलायचे आहेत,’ असे तिने सांगितले. तेव्हा कर्मचाऱ्यांकडून टाळाटाळ करण्यात आली. सराफी पेढीतील कर्मचारी विसपुतेशी महिलेने संपर्क साधला. त्याची सराफी पेढीच्या दुसऱ्या शाखेत बदली झाल्याचे सांगण्यात आले. मात्र, संशय आल्याने महिला हिरेजडित दागिने घेऊन सराफी पेढीच्या दुसऱ्या शाखेत गेली. तेव्हा महिलेकडे असलेले हिरेजडित दागिन्यांची गुणवत्ता (कॅरेट) कमी असल्याचे सांगण्यात आले. महिलेला जादा रक्कमेची बिले देऊन तीन कोटी ४८ लाख ८५ हजार ९९७ रुपयांची फसवणूक केल्याचा प्रकार यामुळे उघडकीस आला. बिलांवर सराफी पेढीचे शिक्के मारण्यात आले होते. महिलेच्या तक्रारीनंतर सराफी पेढीतील व्यवस्थापक, रोखपाल, विपणन व्यवस्थापक, कर्मचारी; तसेच मालकावर गुन्हा दाखल करण्यात आला. आर्थिक गुन्हे शाखेचे पोलिस निरीक्षक कृष्णा इंदलकर अधिक तपास करीत आहेत.