नवी मुंबई : नवी मुंबई महापालिकेत रिक्त असलेल्या उपायुक्तपदावर वर्णी लागावी म्हणून सध्या प्रतिनियुक्तीवरील अधिकाऱ्यांमध्ये चढाओढ लागली आहे. एवढ्यावरच न थांबता मंत्रालयात कार्यरत असलेले काही अधिकारी महापालिका सेवेत कायमस्वरूपी समावेशन करून घेण्यासाठी (मर्जर) थेट मंत्रालयातून रदबदली करून घेण्यासाठी प्रयत्नशील असल्याचे बोलले जाते. मंत्रालयातील अधिकाऱ्यांसह मुख्यमंत्र्यांचे विशेष कार्य अधिकारी म्हणून कार्यरत असलेले अधिकारी नवी मुंबई महापालिकेच्या सेवेत उपायुक्तपदी प्रतिनियुक्तीवर नव्हे तर कायमस्वरूपी समावेशन करून घेण्यासाठी प्रयत्नशील आहेत. तसेच, नवी मुंबई महापालिकेत प्रतिनियुक्तीवर कार्यरत असलेले काही अधिकारीही नवी मुंबई महापालिकेत कायमस्वरूपी समावेशन करून घेण्यासाठी मंत्रालयात प्रयत्नशील आहेत. महापालिकेच्या अतिरिक्त आयुक्तपदाकरिता पदोन्नतीसाठी पात्र ठरत नसतानाही नवी मुंबई महापालिकेतील एका उपायुक्ताने पदोन्नती पदरात पाडून घेण्यासाठी आटापिटा सुरू केला आहे.
विशेष म्हणजे काही दिवसांपूर्वी संबंधित उपायुक्तांकडे लाचलुचपत प्रतिबंधक विभागाचेही लक्ष गेले होते. काही दिवसांपूर्वी कोपरखैरणे पोलिस ठाण्यात लाच घेतल्याप्रकरणी नोंद झालेल्या गुन्ह्यात वरिष्ठ अधिकाऱ्यासाठी लाच स्वीकारल्याचे लिपिकाने जबाबात म्हटले आहे. असे असताना त्यांच्या पदोन्नतीचा प्रस्ताव शीघ्रगतीने मंजुरीच्या प्रतीक्षेत आहे. विशेष म्हणजे नवी मुंबई लाचलुचपत प्रतिबंधक विभागाच्या अधिकाऱ्यांनी महापालिकेला पाठविलेल्या पत्रात पाच लाखांच्या लाचेसंदर्भात कोपरखैरणे पोलिस ठाण्यात दाखल झालेल्या गुन्ह्याच्या अनुषंगाने केवळ लोकसेवक दिनेश सोनवणे याचीच माहिती मागितल्याने आश्चर्य व्यक्त केले जात आहे. लोकसेवकाच्या वरिष्ठ अधिकाऱ्याच्या नावाचा कुठेच उल्लेख न करणाऱ्या लाचलुचपत विभागाने कनिष्ठ अभियंत्याची बदली करणाऱ्या संबंधित उपायुक्ताला साधे चौकशीलाही बोलावले नसल्याचे समजते. परिणामी, संबंधित उपायुक्तांच्या पदोन्नतीच्या प्रस्तावाला मंत्रालयात पुन्हा पाय फुटले आहेत. लवकरच त्यांच्या पदोन्नतीचे आदेश निघणार असल्याचे बोलले जाते. सद्यस्थितीत उपायुक्तांच्या ११ पदांपैकी महापालिका सेवेतील दोनच महापालिका अधिकारी उपायुक्त म्हणून कार्यरत असून त्यापैकी एक उपायुक्त जून २०२३ अखेरीस तर दुसरे उपायुक्त जुलै २०२३ अखेरीस सेवानिवृत्त होत आहे. त्यानंतर नवी मुंबई महापालिका सेवेतील एकही अधिकारी पुढील १० वर्षे उपायुक्ताच्या पदोन्नतीसाठी पात्र ठरणार नसल्याचे प्रशासनाकडून सांगण्यात आले. सद्यस्थितीत महापालिकेचे अवघे तीन अधिकारी साहाय्यक आयुक्त म्हणून कार्यरत असून ते उपायुक्त पदासाठी पात्र ठरण्यापूर्वीच सेवानिवृत्त होणार आहेत. त्यामुळे जुलै २०२३ नंतर नवी मुंबई महापालिकेत ११ उपायुक्तपदांवर प्रतिनियुक्तीवरील अधिकाऱ्यांचेच राज्य राहणार आहे. त्यामुळे प्रतिनियुक्तीवरील व मंत्रालयात कार्यरत असलेले काही अधिकारी नवी मुंबई महापालिकेत कायमस्वरूपी समावेशन करून घेण्यासाठी साम, दाम, दंडाचा वापर करताना दिसून येत आहेत. खरे तर त्यांचे लक्ष उपायुक्तपदावर नसून नवी मुंबई महापालिकेतील दोनपैकी एका अतिरिक्त आयुक्तपदावर आहे. त्यासाठी प्रतिनियुक्तीवरील अधिकाऱ्यांमध्ये जोरदार रस्सीखेच सुरू आहे. नवी मुंबई महापालिकेत उपायुक्ताची एकूण ११ पदे मंजूर असून त्यापैकी सहा पदे महापालिका सेवेतील अधिकाऱ्यांच्या पदोन्नतीने भरली जाणार आहेत. तर, उर्वरित पाच पदांवर प्रतिनियुक्तीवरील अधिकारी सरकारकडून नियुक्त केले जातात. परंतु, नवी मुंबई महापालिकेतील पूर्वाश्रमीच्या उपायुक्तांनी महापालिकेतील अधिकारी-कर्मचाऱ्यांना विहित वेळेत पदोन्नती न दिल्याने अनेक अधिकाऱ्यांचे साहाय्यक आयुक्त व उपायुक्त होण्याचे स्वप्न भंगले आहे. महापालिका सेवेतील अनेक अधिकारी पदोन्नतीसाठी पात्र असतानाही तत्कालीन अधिकाऱ्यांच्या आडमुठे धोरणामुळे पदोन्नतीपासून वंचित राहिले व कालपरत्वे सेवानिवृत्त झाले.