मुंबई : गेल्या अनेक वर्षांपासून रखडलेल्या चांदिवली, संघर्षनगरमधील महापालिकेच्या रुग्णालयाचा संघर्ष अखेर संपला आहे. रुग्णालयासाठी आवश्यक असलेल्या केंद्र सरकारच्या परवानग्या मिळाल्या असून मंगळवारी मुख्यमंत्री एकनाथ शिंदे यांच्या हस्ते भूमीपूजन करण्यात आले. येथे २५० खाटांचे अत्याधुनिक वैद्यकीय सुविधायुक्त १२ मजली रुग्णालय बांधण्यात येणार आहे. या रुग्णालयामुळे पवई, चांदिवली, घाटकोपरमधील रहिवाशांना मोठा दिलासा मिळणार आहे. पालिकेने उपनगरीय वैद्यकीय सेवा अधिक बळकट करण्याचा निर्णय घेतला आहे. त्यानुसार पूर्व आणि पश्चिम उपनगरांत नवीन रुग्णालये तसेच जुन्या रुग्णालयाची डागडुजी व इतर वैद्यकीय सेवा उभारल्या जात आहेत. केईएम, सायन, नायर ही मुंबई महापालिकेची प्रमुख रुग्णालये आहेत. या रुग्णालयांवर असलेला ताण कमी करण्यासाठी प्रयत्न केले जात आहेत. या प्रयत्नांचा भाग म्हणून चांदिवलीतील रुग्णालय येत्या काळात उभे राहणार आहे.
पुढील तीन वर्षांत काम पूर्ण अपेक्षित आहे. इमारत बांधून रुग्णांच्या सेवेत आल्यापासून पुढील ८ वर्षें रुग्णालय इमारत व कर्मचारी वसाहत इमारतींची देखभाल करण्याची जबाबदारी संबंधित कंत्राटदाराची असणार आहे. चांदिवली, संघर्षनगर मधील सीटीएस क्रमांक ११ ए/ ४ वर रुग्णालय बांधकामासह अग्निशमक-अग्निरोधक यंत्रणा, मॉड्युलर ऑपरेशन थिएटर, वैद्यकीय गॅस यंत्रणा, डॉक्टरांसह अन्य कर्मचाऱ्यांसाठी कर्मचारी वसाहतीसह विविध सुविधांचा समावेश या रुग्णालात असणार आहे. तसेच रुग्णालयीन कर्मचाऱ्यांसाठी ३ विंग बांधण्यात येणार आहे. ए विंग १५ मजली, बि विंग – १९ व सी विंग १७ मजली असेल असे पाल‍िकेच्या अधिकाऱ्याने सांगितले. गेल्या २० वर्षांपासून चांदिवली परिसरात रुग्णालयाची मागणी रहिवाशांकडून केली जात होती. या भागातील शिवसेनेचे आमदार दिलीप लांडे यांनी त्यासाठी पाठपुरावा केला होता. रुग्णालयासाठी विविध विविध विभागांकडे पत्रव्यवहार करून पालिकेत प्रस्ताव मांडला मात्र यात अनेक अडचणी येत होत्या. आमदार लांडे यांनी रुग्णालयासाठी आत्मदहन करण्याचा इशारा पालिका आयुक्तांसमोर दिला होता. याप्रकरणी मुख्यमंत्री एकनाथ शिंदे यांनी लक्ष घालत आयुक्तांना रुग्णालयाच्या उभारणीची प्रक्रिया सुरू करण्यास सांगितले होते.