पुणे : देशातील विविधतेतील एकात्मतेचे दर्शन घडविण्यासाठी गायिका मंजुश्री ओक यांनी भारतातील १२१ भाषा, बोलीभाषा आणि उपभाषांमध्ये सलग साडेतेरा तास गाण्यांचे सादरीकरण करून जागतिक विक्रमाला गवसणी घातली. ओक यांनी सादर केलेल्या ‘अमृतवाणी – अनेकता मैं एकता’ या कार्यक्रमाची ‘गिनेस बुक ऑफ वर्ल्ड रेकॉर्डस्’मध्ये नोंद करण्यात आली आहे. यशवंतराव चव्हाण नाट्यगृहामध्ये हा कार्यक्रम आयोजित करण्यात आला होता. ओक यांनी यापूर्वी २०१७ आणि २०१८ अशी सलग दोन वर्षे ‘इंडिया बुक ऑफ रेकॉर्डस्’ व ‘एशिया बुक ऑफ रेकॉर्डस्’मध्ये प्रत्येकी दोन विक्रम नोंदविले आहेत. ‘लहानपणापासून अभिजात भारतीय शास्त्रीय संगीताचे शिक्षण घेत असताना संगीत क्षेत्रातील प्रयत्नांद्वारे देशासाठी काही तरी योगदान द्यावे, हा विचार मनात होता. याच दृष्टीने प्रयत्न करीत असताना ‘श्री यशलक्ष्मी आर्ट’तर्फे आणि पद्मनाभ ठकार यांच्या सहकार्याने ‘अमृतवाणी – अनेकता मैं एकता’ हा कार्यक्रम केला,’ असे ओक यांनी सांगितले.
‘भारतात १८००हून अधिक भाषा, बोलीभाषा, उपभाषा बोलल्या जातात. या सर्व भाषांवर त्या भागांतील संस्कृती, संगीत, परंपरा, भौगोलिक, सामाजिक परिस्थिती यांचा ठळकपणे प्रभाव दिसून येतो. भाषांची निवड केल्यावर गीताच्या चाली, बोल, लहेजा यांवर काम आले. प्रमुख भाषांबरोबरच ईशान्य भारतातील बोलीभाषा, निकोबारी भाषा, हिंदीची उपभाषा असलेली भोजपुरी या भाषांचादेखील समावेश आहे. गाण्यांमध्ये पारंपरिक गीते, लोकगीते, भक्तिगीते, भावगीते, अभंग, देशभक्तिपर गीते; तसेच लावणीला सामावून घेतले. देशातील ही विविधता भाषा आणि गाण्यांच्या स्वरूपात जगापर्यंत पोहोचावी, या उद्देशाने मी हा विक्रम करण्याचा प्रयत्न केला आणि तो यशस्वी ठरला,’ अशी भावना ओक यांनी व्यक्त केली.