मुंबई : मुंबईसह देश-विदेशातील लाखो गणेशभक्तांची प्रतीक्षा अखेर संपणार आहे. गणेशोत्सव २०२६च्या पार्श्वभूमीवर मुंबईतील प्रसिद्ध लालबागचा राजा गणरायाचे पहिले दर्शन आज, शुक्रवार (११ सप्टेंबर) रोजी भाविकांना होणार आहे. लालबागचा राजा सार्वजनिक गणेशोत्सव मंडळाच्या वतीने संध्याकाळी ७ वाजता बाप्पाच्या मनमोहक आणि भव्य मूर्तीचे अधिकृत अनावरण करण्यात येणार आहे. हा सोहळा परळ येथील लालबाग मार्केटमधील मुख्य मंडपात मोठ्या उत्साहात पार पडणार असून, अनावरणापूर्वी माध्यम प्रतिनिधींसाठी विशेष फोटो सेशनचेही आयोजन करण्यात आले आहे. दरवर्षीप्रमाणे यंदाही बाप्पाच्या पहिल्या दर्शनासाठी भाविकांमध्ये प्रचंड उत्सुकता असून, मुंबईसह देशाच्या कानाकोपऱ्यातून तसेच परदेशातूनही हजारो भक्त या क्षणाची आतुरतेने वाट पाहत आहेत.
यंदा लालबागचा राजा सार्वजनिक गणेशोत्सव मंडळ आपले ९३ वे वर्ष साजरे करत आहे. १४ सप्टेंबरपासून सुरू होणारा गणेशोत्सव २५ सप्टेंबर २०२६ पर्यंत भक्तिमय वातावरणात साजरा केला जाणार आहे. या कालावधीत लाखो भाविक राजाच्या दर्शनासाठी लालबागमध्ये दाखल होण्याची अपेक्षा असून, त्यासाठी मंडळाकडून दर्शन रांगा, सुरक्षा व्यवस्था, वाहतूक नियोजन आणि इतर आवश्यक सुविधांची व्यापक तयारी करण्यात आली आहे. दरवर्षी नव्या रूपात विराजमान होणाऱ्या लालबागच्या राजाच्या मूर्तीची पहिली झलक पाहण्यासाठी भक्तांमध्ये नेहमीच मोठी उत्सुकता असते. यंदाही बाप्पाच्या दिव्य आणि आकर्षक रूपाचे अनावरण हा गणेशोत्सवातील सर्वात महत्त्वाचा आणि भावनिक क्षण ठरणार असून, लाखो गणेशभक्तांसाठी हा सोहळा श्रद्धा, भक्ती आणि उत्साहाचा पर्वणीसमान अनुभव ठरणार आहे.
