मुंबई : राज्यातील अंगणवाडी केंद्रांमध्ये बालकांना अधिक दर्जेदार आणि प्रभावी सेवा उपलब्ध करून देण्यासाठी मूलभूत सुविधांचे बळकटीकरण तसेच कुपोषण निर्मूलनासाठी प्रभावी उपाययोजनांची प्राधान्याने अंमलबजावणी करण्याचे निर्देश महिला व बालविकास मंत्री आदिती तटकरे यांनी दिले. मंत्रालयात नंदुरबार, अमरावती (मेळघाट), गडचिरोली, पालघर (वसई वगळून) आणि रायगड (कर्जत-१ व २) या पाच जिल्ह्यांमधील एकात्मिक बाल विकास सेवा योजना (आयसीडीएस) अंतर्गत अंगणवाडी केंद्रांतील पायाभूत सुविधा, आवश्यक उपकरणांची उपलब्धता तसेच जून २०२६ अखेरच्या बालपोषण स्थितीचा सविस्तर आढावा घेण्यात आला. या बैठकीला महिला व बालविकास विभागाचे सचिव डॉ. अनुप कुमार यादव, आयुक्त वर्षा लढ्ढा, आयसीडीएसच्या आयुक्त माधवी सरदेशमुख, सहसचिव वि. रा. ठाकूर, अवर सचिव सरदार, आयसीडीएसचे उपायुक्त विजय क्षीरसागर आणि संबंधित अधिकारी उपस्थित होते. बैठकीत बालपोषणाशी संबंधित विविध बाबींचे सखोल परीक्षण करण्यात आले. बालकांचे वजन आणि उंची मोजण्याची कार्यक्षमता ९९ टक्क्यांहून अधिक असल्याचे निदर्शनास आले असून, गंभीर तीव्र कुपोषण (SAM), मध्यम तीव्र कुपोषण (MAM), कमी वजन आणि खुंटलेली वाढ (Stunting) या बाबींचे जिल्हानिहाय विश्लेषण करण्याचे निर्देश देण्यात आले. ज्या भागांमध्ये कुपोषणाचे प्रमाण अधिक आहे, त्या ठिकाणी विशेष कृती आराखडा तयार करून त्याची प्रभावी अंमलबजावणी करावी, तसेच उर्वरित पायाभूत सुविधांची कामे पूर्ण करण्यासाठी पुढील तीन महिन्यांचा कालबद्ध कृती आराखडा तयार करून सादर करण्याच्या सूचना मंत्री आदिती तटकरे यांनी दिल्या.
यावेळी अंगणवाडी केंद्रांमध्ये आवश्यक सुविधांची शंभर टक्के उपलब्धता सुनिश्चित करण्यावर विशेष भर देण्यात आला. कायमस्वरूपी वीज जोडणी, सौरऊर्जा सुविधांचा विस्तार, आवश्यक उपकरणांची उपलब्धता वाढविणे आणि महिला व बालविकास विभाग तसेच आरोग्य विभाग यांच्यातील समन्वय अधिक परिणामकारक करून कुपोषित बालकांच्या व्यवस्थापनाला गती देण्यासाठी प्रभावी उपाययोजना राबविण्याचे निर्देशही देण्यात आले. बैठकीत अंगणवाडी केंद्रांच्या इमारती, वीज व सौरऊर्जा सुविधा, पिण्याच्या पाण्याची उपलब्धता, स्वच्छतागृहे, कार्यरत स्वयंपाकगृहे तसेच वजनकाटे, इन्फंटोमीटर आणि स्टॅडिओमीटर यांसारख्या आवश्यक उपकरणांच्या उपलब्धतेचा सविस्तर आढावा घेण्यात आला. पाचही जिल्ह्यांतील अंगणवाडी केंद्रांमध्ये पिण्याच्या पाण्याची शंभर टक्के उपलब्धता असल्याचे समोर आले. तसेच बहुतांश केंद्रांमध्ये स्वच्छतागृहे, स्वयंपाकगृहे आणि बालकांच्या वाढीचे मोजमाप करण्यासाठी आवश्यक उपकरणे उपलब्ध असल्याची माहिती बैठकीत देण्यात आली. मात्र, काही भागांमध्ये कायमस्वरूपी वीज जोडणी आणि सौरऊर्जा सुविधांमध्ये सुधारणा करण्याची आवश्यकता असल्याचेही निदर्शनास आले. या पार्श्वभूमीवर बालकांच्या आरोग्य, पोषण आणि सर्वांगीण विकासासाठी आवश्यक सुविधा अधिक सक्षम करण्याबरोबरच कुपोषणमुक्त महाराष्ट्राच्या उद्दिष्टपूर्तीसाठी सर्व संबंधित विभागांनी समन्वयाने आणि कालबद्ध पद्धतीने काम करण्यावर महिला व बालविकास मंत्री आदिती तटकरे यांनी भर दिला.
