मुंबई : कॉक्रोच जनता पार्टीचे संस्थापक अभिजित दीपके यांची प्रकृती बिघडली असून त्यांना टायफॉईड झाल्याचे निदान झाले आहे. गेल्या काही दिवसांपासून तापाने त्रस्त असलेल्या दीपके यांनी रक्त तपासणी केली होती. त्याचा अहवाल आल्यानंतर त्यांना टायफॉईड झाल्याचे स्पष्ट झाले. याबाबत त्यांनी सामाजिक माध्यमावर व्हिडीओद्वारे माहिती दिली. सध्या त्यांच्यावर दररोज सकाळी आणि संध्याकाळी वैद्यकीय उपचार सुरू असून, प्रकृती अस्वस्थ असतानाही आंदोलन सुरू ठेवण्याचा निर्धार त्यांनी व्यक्त केला आहे. देशभरातील समर्थकांनी शांततेच्या मार्गाने आंदोलनाला दिलेल्या पाठिंब्याबद्दल त्यांनी आभार मानले. हे आंदोलन शांततापूर्ण पद्धतीने सुरू राहिल्यास केंद्रीय शिक्षणमंत्री धर्मेंद्र प्रधान यांना राजीनामा द्यावा लागेल, असा विश्वासही त्यांनी व्यक्त केला. तसेच त्यांच्या मते, धर्मेंद्र प्रधान यांच्या राजीनाम्यापर्यंत हा लढा सुरूच राहणार असल्याचे त्यांनी स्पष्ट केले.
दरम्यान, पंतप्रधान नरेंद्र मोदी यांनी नीट पेपरफुटी प्रकरणाच्या पार्श्वभूमीवर परीक्षांमधील गैरप्रकार रोखण्यासाठी कठोर तरतुदी असलेले विधेयक संसदेत आणण्याची घोषणा केली आहे. या घोषणेवर प्रतिक्रिया देताना अभिजित दीपके यांनी, परीक्षांतील अनियमिततेविरोधात सरकारने उचलू शकणारे सर्वात कठोर पाऊल म्हणजे केंद्रीय शिक्षणमंत्री धर्मेंद्र प्रधान यांना पदावरून हटवणे, असे मत व्यक्त केले. कॉक्रोच जनता पार्टीचे राष्ट्रीय प्रवक्ते आशुतोष रांका यांनीही यासंदर्भात प्रतिक्रिया देत, पंतप्रधानांनी धर्मेंद्र प्रधान यांना तातडीने पदावरून हटवावे, हीच सर्वात कठोर आणि प्रभावी कारवाई ठरेल, असे म्हटले. या घडामोडींमुळे नीट पेपरफुटी प्रकरणावरील आंदोलन आणि त्यासंदर्भातील राजकीय प्रतिक्रिया अधिक तीव्र होण्याची चिन्हे दिसत आहेत.
