सिंधुदुर्ग : सिंधुदुर्गच्या पारंपरिक दशावतार लोककलेशी संबंधित कलाकारांना शासनाच्या विविध योजनांचा लाभ मिळावा आणि त्यांची अधिकृत नोंदणी व्हावी या उद्देशाने जिल्ह्यात विशेष नोंदणी मोहिमेला सुरुवात झाली आहे. आमदार निलेश राणे यांनी पावसाळी अधिवेशनात दशावतार कलाकारांच्या प्रश्नांवर सातत्याने पाठपुरावा केल्यानंतर आणि सांस्कृतिक कार्यमंत्री आशिष शेलार यांनी कलाकारांच्या मानधनात वाढ जाहीर केल्यानंतर ही प्रक्रिया प्रत्यक्षात सुरू झाली आहे. या मोहिमेसाठी मंत्रालयातील सांस्कृतिक कार्य संचालनालयाचे अधिकारी थेट सिंधुदुर्गात दाखल झाले असून, कलाकारांना अधिकृत ओळखपत्र मिळवून देणे आणि त्यांना शासकीय योजनांचा लाभ मिळवून देणे हा या उपक्रमाचा मुख्य उद्देश आहे. या अंतर्गत मालवण पंचायत समिती येथे विशेष नोंदणी शिबिराचे आयोजन करण्यात आले. या शिबिरात मालवण तालुक्यातील १०७ दशावतार कलाकारांची अधिकृत नोंदणी करण्यात आली. यापुढे सिंधुदुर्ग जिल्ह्यातील सर्व तालुक्यांमध्ये टप्प्याटप्प्याने ही नोंदणी प्रक्रिया राबविण्यात येणार आहे. सांस्कृतिक कार्यमंत्री आशिष शेलार यांच्या निर्देशानुसार, सांस्कृतिक कार्य संचालनालयाचे सहाय्यक संचालक जयश्री घुगे, लेखाधिकारी गायत्री वेजारे आणि लिपिक सहदेव खैरे यांचे पथक जिल्ह्यात दाखल झाले असून, मालवण पंचायत समितीत गटविकास अधिकारी परागिणी पाटील यांनी त्यांचे स्वागत केले.
या नोंदणी मोहिमेदरम्यान सहाय्यक गटविकास अधिकारी पांडुरंग सावंत, उपसभापती घनश्याम झाड तसेच पारंपारिक दशावतार कलाकार बहुउद्देशीय संघटना, सिंधुदुर्ग (मालवण शाखा) चे अध्यक्ष पुरुषोत्तम खेडेकर, उपाध्यक्ष ओमप्रकाश चव्हाण, सचिव विनायक येरागी आणि संघटनेचे अनेक पदाधिकारी व कलाकार उपस्थित होते. पहिल्याच दिवशी १०७ कलाकारांची नोंदणी पूर्ण झाल्याने या उपक्रमाला उत्स्फूर्त प्रतिसाद मिळाल्याचे दिसून आले. दरम्यान, मालवण तालुक्यातील अद्याप नोंदणी न झालेल्या कलाकारांनी लवकरात लवकर संघटनेचे तालुका सचिव विनायक येरागी यांच्याशी संपर्क साधून नोंदणी पूर्ण करावी, असे आवाहन करण्यात आले आहे. आमदार निलेश राणे यांनी राज्याच्या पावसाळी अधिवेशनात दशावतार कलाकारांच्या समस्या प्रभावीपणे मांडत, केवळ मानधनवाढ न करता प्रत्येक कलाकाराची शासनाकडे अधिकृत नोंदणी होऊन त्यांना ओळखपत्र मिळाले पाहिजे, अशी ठाम भूमिका घेतली होती. त्यानुसार आता प्रशासकीय अधिकारी थेट कलाकारांपर्यंत पोहोचून नोंदणी प्रक्रिया राबवत असल्याने भविष्यात एकही कलाकार शासकीय योजनांपासून वंचित राहणार नाही, अशी अपेक्षा व्यक्त केली जात आहे. या उपक्रमामुळे सिंधुदुर्गातील दशावतार कलाकारांमध्ये समाधानाचे वातावरण असून, त्यांनी या प्रयत्नांबद्दल आमदार निलेश राणे आणि राज्य शासनाचे आभार व्यक्त केले आहेत.
