मुंबई : मुंबईतील कांदिवली पूर्व परिसरात एका अल्पवयीन मुलीची डोंगरकड्यावरून ढकलून हत्या केल्याची धक्कादायक घटना उघडकीस आली आहे. समता नगर पोलीस ठाण्याच्या हद्दीतील दामू नगर परिसरामागील डोंगरावर ही घटना घडली. शुक्रवारी सकाळी स्थानिक नागरिकांना डोंगराळ भागात एका अल्पवयीन मुलीचा मृतदेह आढळून आला. घटनेची माहिती मिळताच समता नगर पोलिसांनी घटनास्थळी धाव घेत तपास सुरू केला. प्राथमिक तपासानंतर ही अपघाती घटना नसून हत्या असल्याचा संशय बळावला. त्यानंतर गुन्हे शाखेच्या मदतीने पोलिसांनी तांत्रिक पुरावे, उपलब्ध माहिती आणि गुप्त सूत्रांच्या आधारे तपासाची गती वाढवली. अवघ्या २४ तासांच्या आत पोलिसांनी सूरज मारुती वाघमारे या आरोपीला अटक केली. तो पेशाने डिलिव्हरी बॉय असून मृत अल्पवयीन मुलीचा परिचित असल्याची माहिती तपासातून समोर आली आहे. पोलिसांच्या प्राथमिक तपासानुसार आरोपीने मुलीला डोंगराच्या कड्यावर नेल्यानंतर तिला खाली ढकलल्याचा आरोप आहे. या घटनेमागील नेमके कारण आणि दोघांमधील संबंधांचा तपास पोलीस करत आहेत. आरोपीविरुद्ध संबंधित कलमान्वये गुन्हा दाखल करण्यात आला असून पुढील तपास सुरू आहे.
या घटनेची तुलना अलीकडेच चर्चेत आलेल्या पुणे जिल्ह्यातील लोहगड किल्ला परिसरातील हत्याप्रकरणाशी केली जात आहे. त्या प्रकरणात ट्रेकिंगदरम्यान एका तरुणाचा मृत्यू सुरुवातीला अपघात असल्याचे वाटत होते. मात्र, पोलिस तपासात तो पूर्वनियोजित खून असल्याचा आरोप समोर आला होता. कांदिवलीतील प्रकरणातही डोंगरकड्यावरून ढकलून हत्या केल्याचा आरोप असल्याने या दोन घटनांमध्ये साम्य असल्याची चर्चा होत आहे. तथापि, दोन्ही घटना स्वतंत्र असून त्यांचा तपास वेगवेगळ्या परिस्थिती आणि पुराव्यांच्या आधारे केला जात आहे. दरम्यान, कांदिवलीतील या घटनेमुळे परिसरात खळबळ उडाली असून अल्पवयीन मुलीच्या मृत्यूमुळे नागरिकांमध्ये हळहळ व्यक्त होत आहे. पोलिसांनी या प्रकरणातील सर्व बाजूंचा सखोल तपास सुरू ठेवला असून आरोपीकडून अधिक माहिती मिळविण्याचा प्रयत्न केला जात आहे.
