नवी दिल्ली : महागाईच्या झळा सहन करणाऱ्या सर्वसामान्य नागरिकांना पुन्हा एकदा मोठा आर्थिक फटका बसला आहे. सरकारी तेल कंपन्यांनी घरगुती वापराच्या १४.२ किलोच्या एलपीजी गॅस सिलिंडरच्या किमतीत २९ रुपयांची वाढ जाहीर केली असून ही वाढ मध्यरात्री १२ वाजल्यापासून लागू करण्यात आली आहे. आंतरराष्ट्रीय बाजारात इंधनाच्या किमतीत होत असलेल्या वाढीचा परिणाम देशांतर्गत एलपीजी दरांवर झाला असून त्यानुसार ही दरवाढ करण्यात आल्याचे सांगितले जात आहे. नवीन दर लागू झाल्यानंतर देशातील प्रमुख शहरांमध्ये गॅस सिलिंडरच्या किमती वाढल्या आहेत. मुंबईत घरगुती गॅस सिलिंडरची किंमत ९१२.५० रुपयांवरून ९४१.५० रुपयांपर्यंत पोहोचली आहे. त्याचप्रमाणे दिल्लीमध्ये सिलिंडरची किंमत ९१३ रुपयांवरून ९४२ रुपये झाली आहे. कोलकाता येथे ग्राहकांना आता एका सिलिंडरसाठी ९६८ रुपये मोजावे लागणार आहेत.
ही दरवाढ गेल्या तीन महिन्यांतील घरगुती एलपीजी सिलिंडरच्या किमतीतील दुसरी वाढ ठरली आहे. यापूर्वी ७ मार्च रोजी तेल कंपन्यांनी सिलिंडरच्या दरात तब्बल ६० रुपयांची वाढ केली होती. त्यानंतर आता पुन्हा २९ रुपयांची वाढ करण्यात आल्याने अवघ्या तीन महिन्यांच्या कालावधीत घरगुती गॅस सिलिंडरच्या किमतीत एकूण ८९ रुपयांची वाढ झाली आहे. वाढत्या महागाईमुळे आधीच सर्वसामान्यांचे घरगुती बजेट विस्कळीत झाले असताना या नव्या दरवाढीमुळे त्यांचा आर्थिक भार आणखी वाढणार आहे. पेट्रोल, डिझेल आणि इतर अत्यावश्यक वस्तूंच्या वाढत्या किमतींच्या पार्श्वभूमीवर एलपीजीच्या वाढलेल्या दरांचा थेट परिणाम कुटुंबांच्या मासिक खर्चावर होणार आहे. त्यामुळे या निर्णयाबाबत ग्राहकांमध्ये नाराजी व्यक्त होत असून घरगुती खर्चाचे गणित पुन्हा एकदा बिघडण्याची शक्यता निर्माण झाली आहे.
