ठाणे : महाराष्ट्र शासनाच्या महिला व बाल विकास विभागाच्या आदेशानुसार जिल्हा महिला व बाल विकास अधिकारी, मुंबई शहर या पदावर कार्यरत असलेल्या शोभा म. शेलार यांची जिल्हा कार्यक्रम अधिकारी (महिला व बाल विकास), जिल्हा परिषद ठाणे या पदावर बदली करण्यात आली आहे. त्यांनी १ जून २०२६ रोजी नव्या पदाचा कार्यभार स्वीकारला. शासनाच्या निर्देशानुसार त्यांनी ठाणे जिल्हा परिषदेत रुजू होताना जिल्हा महिला व बाल विकास अधिकारी, मुंबई शहर या पदाचा अतिरिक्त कार्यभारही स्वीकारला आहे. महिला व बाल विकास क्षेत्रातील विविध योजनांच्या अंमलबजावणीचा दीर्घ अनुभव असलेल्या शेलार यांनी यापूर्वी विविध पदांवर कार्यरत राहून महिला सक्षमीकरण, बाल संरक्षण, पोषण अभियान, एकात्मिक बाल विकास सेवा योजना तसेच अंगणवाडी सेवांच्या बळकटीकरणासाठी उल्लेखनीय कार्य केले आहे.
शेलार यांच्या नियुक्तीमुळे ठाणे जिल्हा परिषद अंतर्गत महिला व बाल विकास विभागामार्फत राबविण्यात येणाऱ्या विविध योजनांच्या अंमलबजावणीला अधिक गती मिळण्याची अपेक्षा व्यक्त केली जात आहे. विशेषतः महिला आणि बालकांच्या आरोग्य, पोषण, शिक्षण, संरक्षण व सर्वांगीण विकासाशी संबंधित उपक्रम अधिक प्रभावीपणे राबविण्यासाठी त्यांच्या अनुभवाचा मोठा फायदा होणार आहे. विविध शासकीय कल्याणकारी योजनांचा लाभ अधिकाधिक पात्र लाभार्थ्यांपर्यंत पोहोचविण्यासाठीही त्यांच्या नेतृत्वाची महत्त्वपूर्ण भूमिका राहणार आहे. जिल्हा परिषद ठाणे प्रशासनाच्या वतीने त्यांचे स्वागत करण्यात आले असून त्यांच्या मार्गदर्शनाखाली महिला व बाल विकास विभागाच्या कामकाजाला अधिक बळकटी मिळेल आणि योजनांची प्रभावी अंमलबजावणी सुनिश्चित होईल, असा विश्वास प्रशासनाकडून व्यक्त करण्यात आला आहे.
