पुणे : पावसाळ्यापूर्वी नालेसफाई आणि पावसाळी वाहिन्यांच्या स्वच्छतेवर महापालिका दरवर्षी कोट्यवधी रुपये खर्च करते. मात्र, पहिल्याच पावसात शहरातील अनेक रस्ते जलमय होत असल्याने नालेसफाईच्या कामांवर सातत्याने प्रश्नचिन्ह उपस्थित केले जाते. याच पार्श्वभूमीवर कंत्राटदारांच्या कथित कागदी कामांवर आणि गैरप्रकारांवर लगाम घालण्यासाठी पुणे महापालिकेने अत्याधुनिक रोबोटिक तंत्रज्ञानाचा वापर करण्याचा निर्णय घेतला आहे. शहरातील नाले आणि पावसाळी वाहिन्यांची प्रत्यक्ष सफाई झाली आहे की नाही, याची पडताळणी करण्यासाठी १५ जूननंतर भुयारी वाहिन्यांमध्ये रोबोट उतरवण्यात येणार आहेत. कामात त्रुटी आढळल्यास संबंधित कंत्राटदार आणि अधिकाऱ्यांवर कठोर कारवाई केली जाईल, असा इशारा अतिरिक्त आयुक्त प्रजित नायर यांनी दिला आहे. मान्सूनपूर्व सुरू असलेल्या विविध कामांचा आढावा घेताना त्यांनी सर्व विभागांना कामे वेळेत आणि दर्जेदार पद्धतीने पूर्ण करण्याचे निर्देश दिले.
महापालिका हद्दीत एकूण ४९ हजार ६५६ स्टॉर्म वॉटर चेंबर्स असून त्यांची पावसाळ्यापूर्वी साफसफाई करणे कंत्राटदारांना बंधनकारक आहे. यापैकी सुमारे १,५०० ते २,००० चेंबर्स आणि वाहिन्यांची रोबोटच्या माध्यमातून अचानक तपासणी केली जाणार आहे. या डिजिटल ऑडिटमुळे प्रत्यक्ष सफाई झाली की केवळ कागदोपत्री काम दाखवण्यात आले, याचा स्पष्ट पुरावा प्रशासनाला मिळणार आहे. शहरातील १९ चेंबर्समध्ये नुकताच या रोबोटचा पायलट प्रकल्प राबवण्यात आला होता आणि तो यशस्वी ठरल्यानंतर ही यंत्रणा व्यापक स्तरावर वापरण्याचा निर्णय घेण्यात आला आहे. दरम्यान, नालेसफाईदरम्यान काढलेला गाळ रस्त्यावरच टाकून देणाऱ्या कंत्राटदारांवरही प्रशासनाने कडक भूमिका घेतली आहे. अशा प्रकारचे प्रकार आढळल्यास नागरिकांनी तत्काळ छायाचित्रांसह महापालिकेला माहिती द्यावी, असे आवाहन करण्यात आले असून दोषींवर तातडीने कठोर कारवाई केली जाईल, असे प्रजित नायर यांनी स्पष्ट केले आहे.
