मुंबई : कृत्रिम बुद्धिमत्ता (AI) हे भविष्यातील परिवर्तनाचे सर्वात प्रभावी माध्यम असून जीवनाच्या प्रत्येक क्षेत्रात त्याचा स्वीकार करणे आवश्यक असल्याचे प्रतिपादन मुख्यमंत्री देवेंद्र फडणवीस यांनी केले. सह्याद्री अतिथिगृह येथे मुंबई टेक वीक (MTW) २०२६ ची घोषणा करताना ते बोलत होते. टेक एंटरप्रेन्योर्स असोसिएशन ऑफ मुंबई (TEAM) तर्फे महाराष्ट्र शासनाच्या सहकार्याने, IDFC FIRST Bank आणि Meta Platforms यांच्या संयुक्त विद्यमाने हा कार्यक्रम २९ आणि ३० मे रोजी Jio World Convention Centre येथे आयोजित करण्यात आला आहे. “इंडिया : AI इन ॲक्शन” या थीमवर आधारित या कार्यक्रमात विविध क्षेत्रांमधील AI च्या प्रत्यक्ष वापराचे सादरीकरण होणार असून OpenAI, Google Cloud, Anthropic आणि नेसा यांसारख्या कंपन्यांचा सहभाग असणार आहे. यावेळी मुंबई टेक वीक २०२६ च्या लोगोचेही अनावरण करण्यात आले. मुख्यमंत्री फडणवीस यांनी शासन प्रशासनात AI चा वापर वाढत असल्याचे सांगत, या तंत्रज्ञानामुळे प्रशासन अधिक सक्षम आणि परिणामकारक होत असल्याचे नमूद केले. मुंबई टेक वीकसारख्या व्यासपीठांमुळे युवकांना जागतिक दर्जाच्या AI संधी उपलब्ध होतील आणि महाराष्ट्र AI उद्योगवृद्धीचे केंद्र बनेल, असा विश्वास त्यांनी व्यक्त केला.
TEAM चे सह-अध्यक्ष हर्ष जैन यांनी मुख्यमंत्री फडणवीस यांच्या सहकार्याबद्दल आभार मानत, मुंबई टेक वीक २०२६ हे केवळ चर्चांपुरते मर्यादित न राहता उद्योगांमध्ये AI मुळे घडणारे बदल आणि आर्थिक संधी प्रत्यक्ष दाखवणारे व्यासपीठ ठरेल, असे सांगितले. या कार्यक्रमात AI एक्सीलेंस अवॉर्ड्स २०२६, अर्ली स्टेज स्टार्टअप शोकेस, AI आधारित जॉब फेअर, मास्टरक्लासेस आणि “स्टोरीज अनप्लग्ड” सत्रांचे आयोजन करण्यात येणार आहे. जॉब फेअरमध्ये २५ हून अधिक कंपन्या सहभागी होणार असून ३० हजारांपेक्षा अधिक उमेदवारांसाठी २५० हून अधिक रोजगार संधी उपलब्ध करून दिल्या जाणार आहेत. मुख्य कार्यक्रमाच्या पूर्वतयारीसाठी मुंबईभर १४ सॅटेलाईट इव्हेंट्स आयोजित केले जाणार आहेत. TEAM ही मुंबईच्या तंत्रज्ञान परिसंस्थेला बळकटी देणारी स्वतंत्र ना-नफा संस्था असून हर्ष जैन, आकृत वैश, ध्रुविल संघवी, आकांक्षा हजारी आणि इतर नामवंत उद्योजक या संस्थेच्या गव्हर्निंग कौन्सिलमध्ये सहभागी आहेत.
