मुंबई : सोशल मीडियावर सध्या ‘कॉकरोच जनता पार्टी’ची अर्थात CJP नावाच्या एका व्यंगात्मक मोहिमेची जोरदार चर्चा सुरू आहे. सुरुवातीला हा केवळ विनोद किंवा मीम मोहिमेचा भाग असल्याचे अनेकांना वाटत होते, मात्र काहीच दिवसांत या अकाउंटने सोशल मीडियावर मोठी लोकप्रियता मिळवत सर्वांचे लक्ष वेधून घेतले आहे. उपलब्ध माहितीनुसार, CJP च्या Instagram अकाउंटवर सध्या तब्बल १०.९ दशलक्ष फॉलोअर्स आहेत. विशेष म्हणजे हा आकडा भारतीय जनता पार्टीच्या अधिकृत Instagram अकाउंटपेक्षाही जास्त असल्याची चर्चा रंगली आहे. भाजपच्या अधिकृत अकाउंटवर सुमारे ८.७ दशलक्ष फॉलोअर्स असून, हजारो पोस्ट्सनंतर हा आकडा गाठण्यात आला आहे. तर दुसरीकडे CJP ने केवळ ५६ पोस्ट्सच्या माध्यमातूनच सोशल मीडियावर मोठा प्रभाव निर्माण केल्याचे सांगितले जात आहे. या अनोख्या मोहिमेमुळे इंटरनेटवर मीम्स, चर्चा आणि प्रतिक्रिया यांचा अक्षरशः पूर आला आहे.
मिळालेल्या माहितीनुसार, ‘कॉकरोच जनता पार्टी’ची स्थापना अभिजीत दीपके यांनी केल्याचे सांगितले जात आहे. ते अमेरिकेतील Boston University येथे शिक्षण घेत असून राजकीय संवाद रणनीतीकार म्हणून कार्यरत आहेत. सोशल मीडियावरील एका वादग्रस्त वक्तव्याच्या निषेधातून ही व्यंगात्मक मोहीम सुरू झाल्याचे बोलले जात आहे. काही अहवालांनुसार, बेरोजगार तरुणांबाबत करण्यात आलेल्या एका वादग्रस्त टिप्पणीच्या पार्श्वभूमीवर या मोहिमेचा जन्म झाला. सध्या सोशल मीडियावर या मोहिमेबाबत वेगवेगळ्या प्रतिक्रिया उमटत असून, अनेक जण याला डिजिटल व्यंग आणि युवा नाराजीचे प्रतीक मानत आहेत.
