नवी मुंबई : नवी मुंबई महानगरपालिका (NMMC) च्या मालमत्ता कर विभागाने आर्थिक वर्ष २०२६-२७ साठीची ई-बिले तयार करून ती नागरिकांसाठी ऑनलाइन उपलब्ध करून दिली आहेत. या नव्या डिजिटल सुविधेमुळे नागरिकांना व्हॉट्सअॅप चॅटबॉट तसेच महापालिकेच्या अधिकृत संकेतस्थळाच्या माध्यमातून काही मिनिटांतच आपले मालमत्ता कर बिल पाहता, डाउनलोड करता आणि थेट भरणा करता येणार आहे. वाढत्या डिजिटायझेशनच्या पार्श्वभूमीवर नागरिकांना जलद, पारदर्शक आणि सुलभ सेवा देण्याच्या उद्देशाने ही प्रणाली सुरू करण्यात आली आहे. पारंपरिक पद्धतीने घरपोच बिल येण्याची वाट पाहण्याऐवजी नागरिकांना आता घरबसल्या सर्व प्रक्रिया पूर्ण करता येणार असून, त्यामुळे वेळ आणि श्रमांची मोठी बचत होणार आहे.
महापालिकेच्या सर्व प्रभाग कार्यालयांतील संकलन केंद्रे तसेच मुख्यालयातील नागरी सुविधा केंद्रांमधूनही कर भरण्याची सुविधा उपलब्ध ठेवण्यात आली आहे. ही केंद्रे कार्यालयीन दिवशी सकाळी १० ते दुपारी ३ आणि पहिल्या व तिसऱ्या शनिवारी सकाळी १० ते दुपारी १२ या वेळेत सुरू असतात. याशिवाय अधिकृत संकेतस्थळावर ‘मालमत्ता कर’ पर्याय निवडून मालमत्ता क्रमांक टाकल्यास बिल पाहणे, डाउनलोड करणे आणि ऑनलाइन भरणा करणे सहज शक्य आहे. कर भरण्यासाठी क्रेडिट कार्ड, डेबिट कार्ड, यूपीआय, नेट बँकिंग, वॉलेट आणि क्यूआर कोड अशा विविध डिजिटल पर्यायांची सोय उपलब्ध करून देण्यात आली आहे. महापालिका आयुक्त डॉ. कैलास शिंदे यांनी नागरिकांनी या डिजिटल सुविधेचा जास्तीत जास्त वापर करून वेळेत कर भरणा करावा, असे आवाहन केले आहे. व्हॉट्सअॅप चॅटबॉटच्या माध्यमातून बिल मिळवण्यासाठी नागरिकांनी ८२९१९२०५०४ या क्रमांकावर ‘Hi’ असा संदेश पाठवायचा आहे. त्यानंतर भाषा निवडून ‘मालमत्ता कर भरणा’ हा पर्याय निवडल्यावर १२ अंकी मालमत्ता क्रमांक टाकावा लागेल. त्यानंतर संबंधित मालमत्तेची माहिती, मालकाचे नाव, पत्ता आदी तपशील स्क्रीनवर दिसतात आणि त्या आर्थिक वर्षाचे बिल पीडीएफ स्वरूपात उपलब्ध होते. याच प्लॅटफॉर्मवर ‘पे नाऊ’ पर्यायाद्वारे तत्काळ भरणा करण्याची सोयही देण्यात आली आहे. या उपक्रमामुळे महसूल संकलन प्रक्रियेला गती मिळण्याबरोबरच नागरिकांचा वेळ वाचणार असून, प्रशासनाने याबाबत सकारात्मक परिणामांची अपेक्षा व्यक्त केली आहे.
