आता मेट्रो कोचमध्ये घ्या जेवणाचा आस्वाद! पुणे मेट्रोचं देशातील पहिलं ‘कोच रेस्टॉरंट’ जिल्हा न्यायालय स्थानकावर सुरू

पुणे : पुणेकरांच्या प्रवासाला आता खमंग चवीची फोडणी मिळणार आहे. पुणे मेट्रोने प्रवाशांसाठी एक खास भेट आणली असून, आता चक्क मेट्रोच्या डब्यात बसून वातानुकूलित (AC) वातावरणात जेवणाचा आनंद घेता येणार आहे. महामेट्रोने जिल्हा न्यायालय मेट्रो स्थानकाच्या परिसरात ‘मेट्रो कोच रेस्टॉरंट’ उभारले असून, त्याचे काम आता पूर्ण झाले आहे.

महामेट्रोने तिकिटाव्यतिरिक्त उत्पन्न वाढवण्यासाठी हा अभिनव प्रयोग केला आहे. टिटागड कंपनीने दिलेल्या जुन्या मॉडेल कोचचे रूपांतर एका आलिशान रेस्टॉरंटमध्ये करण्यात आले आहे. हे रेस्टॉरंट जिल्हा न्यायालय स्थानकाजवळील कौटुंबिक न्यायालयाच्या (Family Court) परिसरात उभारण्यात आले असून, लवकरच ते पुणेकरांसाठी खुले होईल. वनाझ-रामवाडी आणि पिंपरी चिंचवड-स्वारगेट या मार्गावर दररोज लाखो प्रवासी प्रवास करतात. या प्रवाशांना आणि पर्यटकांना आकर्षित करण्यासाठी हे रेस्टॉरंट उत्तम पर्याय ठरेल. या उपक्रमातून महामेट्रोला दरमहा सुमारे १ लाख ४५ हजार रुपयांचा महसूल मिळणार आहे. निविदा प्रक्रियेनंतर हे रेस्टॉरंट पूर्ण क्षमतेने सुरू होईल, जिथे प्रवाशांना वाजवी दरात दर्जेदार खाद्यपदार्थ उपलब्ध होतील. अतिरिक्त महासंचालक (जनसंपर्क) चंद्रशेखर तांबवेकर यांनी सांगितले की, जुन्या कोचचा पुनर्वापर करून हे आकर्षक रेस्टॉरंट साकारले आहे. प्रवाशांना कमी दरात चांगल्या सुविधा देणे आणि तिकिटाव्यतिरिक्त महसूल वाढवणे हा आमचा मुख्य उद्देश आहे. जिल्हा न्यायालय इंटरचेंज मेट्रो स्टेशन (E-Court Station), कामगार पुतळा वसाहत जवळ, शिवाजीनगर, पुणे – ४११००५. तुम्ही मेट्रोच्या पिंपरी-चिंचवड ते स्वारगेट (Purple Line) किंवा वणझ ते रामवाडी (Aqua Line) या दोन्ही मार्गांनी या स्थानकावर येऊ शकता. हे एक इंटरचेंज स्टेशन असल्याने येथे पोहोचणे सोपे आहे.

या उपक्रमाची काही खास वैशिष्ट्ये खालीलप्रमाणे आहेत :

• हे रेस्टॉरंट पुणे मेट्रोच्या जिल्हा न्यायालय स्थानकाच्या परिसरात (E-court station) आहे.
• खऱ्या मेट्रो कोचमध्ये बसून जेवणाचा आनंद घेता येईल अशा पद्धतीने याची रचना करण्यात आली आहे. याचे इंटेरिअर अतिशय आकर्षक आणि आरामदायी करण्यात आले आहे.
• येथे शाकाहारी आणि मांसाहारी अशा दोन्ही प्रकारचे पदार्थ उपलब्ध आहेत. यामध्ये प्रामुख्याने मल्टी-क्युझिन (Multi-cuisine) मेन्यू असून नाश्ता, लंच आणि डिनरची सोय आहे.
• हे रेस्टॉरंट सकाळी ११:०० ते रात्री ११:०० वाजेपर्यंत खुले असते.
•  हे रेस्टॉरंट पूर्णपणे वातानुकूलित (AC) असून एकावेळी साधारण ४० लोक बसू शकतात.
• स्थानक परिसरात सशुल्क (Paid) पार्किंगची सोय उपलब्ध आहे.
• हे रेस्टॉरंट मल्टी-क्युझिन असून येथे भारतीय आणि स्नॅक्सचे विविध प्रकार मिळतात.