मुंबई : मुंबई महापालिकेच्या शाळेत शिकणाऱ्या विद्यार्थ्यांना दिल्या जाणाऱ्या २७ शालेय वस्तूंची खरेदी केंद्र सरकारच्या जैम पोर्टलवरून करण्यात येणार आहे. त्यामुळे सध्या सुरू असलेली निविदा प्रक्रिया पालिका प्रशासनाने रद्द केली आहे. या सामग्री खरेदीतील मध्यस्थाची साखळी मोडीत काढण्यासाठी व या वस्तूंच्या पुरवठादारांमध्ये जागतिक पातळीवरील नामांकित कंत्राटदारांनी सहभागी व्हावे याकरीता हा निर्णय घेण्यात आल्याची माहिती स्थायी समिती अध्यक्ष प्रभाकर शिंदे यांनी दिली. सध्याची निविदा प्रक्रिया रद्द केली असली तरी शाळेच्या पहिल्या दिवशी विद्यार्थ्यांना शैक्षणिक वस्तू मिळतील, असे आश्वासनही शिंदे यांनी दिले.
मुंबई महापालिकेच्या शाळांमध्ये शिकणाऱ्या विद्यार्थ्यांना गेल्या अनेक वर्षांपासून गणवेशापासून पेन्सिल, रबर, वह्या, पुस्तके, बूट मोजे, छत्री अशा २७ विविध वस्तू मोफत दिल्या जात आहेत. या वस्तूंच्या खरेदी प्रणालीत आमूलाग्र बदल करण्याची मागणी आमदार अमीत साटम यांनी केली होती. २७ शालेय वस्तूंची खरेदी केंद्र सरकारच्या जैम पोर्टलवरून थेट उत्पादकांकडूनच करावी, अशी मागणीही त्यांनी केली होती. त्यानुसार मुंबई महापालिकेत सत्ताधारी महायुतीने अंमलबजावणीला सुरूवात केली आहे. शालेय विद्यार्थ्यांसाठी २०२६-२७ आणि २०२७-२८ या दोन वर्षांसाठी मुंबई महापालिका खरेदी करत असलेल्या २७ शैक्षणिक वस्तूंची निविदा प्रक्रिया रद्द करण्याचा निर्णय महापालिका शिक्षण विभागाने घेतला आहे. ही संपूर्ण प्रक्रिया पारदर्शक व्हावी आणि या सामग्री खरेदीतील मध्यस्थाची साखळी मोडीत निघावी यासाठी केंद्र सरकारच्या जेम (GEM-गव्हर्नमेंट ई मार्केटप्लेस) पोर्टलवरून करण्याची मागणी अमित साटम यांनी मुंबई महापालिकेकडे केली होती. त्याची दखल घेऊन ही निविदा प्रकिया रद्द करण्यात आली आहे. मूळ शिवसेनेने त्यांच्या महापालिकेतील सत्ता काळात सुरू केलेली शालेय वस्तू वाटप प्रक्रियेवर बोट ठेवून ती नव्याने केंद्र सरकारच्या जेम पोर्टलमार्फत रबावण्यात येत असल्याने नव्या वादाला तोंड फुटण्याची शक्यता आहे.
