नवी दिल्ली : दिल्ली सरकारने माजी पंतप्रधान अटलबिहारी वाजपेयी यांच्या १०१ व्या जयंतीनिमित्त ‘अटल कॅन्टीन’ योजनेची सुरुवात केली. या योजनेअंतर्गत शहरात १०० ठिकाणी ५ रुपयांत एक प्लेट जेवण मिळणार आहे. तसेच प्रत्येक कॅन्टीनमध्ये सुमारे ५०० लोकांना जेवण उपलब्ध करून दिले जाईल. दिल्लीच्या मुख्यमंत्री रेखा गुप्ता यांनी अटल कॅन्टीन हे असे ठिकाण असेल जिथे कोणालाही उपाशी झोपावे लागणार नाही, असे म्हटले आहे.
मुख्यमंत्र्यांनी अटल कॅन्टीनला भेट दिली, जिथे त्यांनी जेवण वाढणाऱ्या आणि जेवण करणाऱ्या लोकांशी संवाद साधला. संवादादरम्यान लोकांनी सांगितले की, ५ रुपयांमध्ये असे स्वादिष्ट आणि पौष्टिक जेवण मिळणे ही मोठी गोष्ट आहे. दिल्ली सरकारचा हा उपक्रम गरीब आणि मजुरांसाठी संजीवनीपेक्षा कमी नाही. या योजनेचा उद्देश गरीब, मजूर आणि कमी उत्पन्न असलेल्या कुटुंबांना सन्मानाने भोजन उपलब्ध करून देणे हा आहे. सरकारने दिल्लीतील विविध भागांमध्ये, ज्यात आरके पुरम, जंगपुरा, शालीमार बाग, ग्रेटर कैलाश, राजौरी गार्डन, नरेला, बवाना यांचा समावेश आहे, अशा ४५ अटल कॅन्टीनची सुरुवात केली आहे. उर्वरित ५५ कॅन्टीनचे उद्घाटन येत्या काही दिवसांत केले जाईल. या कॅन्टीनमध्ये दररोज दोन वेळा जेवण दिले जाईल. कॅन्टीन दोन शिफ्टमध्ये चालेल. पहिल्या शिफ्टमध्ये सकाळी ११ वाजल्यापासून ते संध्याकाळी ४ वाजेपर्यंत लोक जेवण करू शकतील. तर दुसऱ्या शिफ्टमध्ये संध्याकाळी ६.३० वाजल्यापासून ते रात्री ९.३० वाजेपर्यंत कॅन्टीन उघडी राहील. जेवणाच्या थाळीमध्ये डाळ, भात, चपाती, हंगामी भाजी आणि लोणचे यांचा समावेश आहे.
