नाशिक : राज्याचे क्रीडा मंत्री माणिकराव कोकाटे यांना शासकीय कोट्यातील १० टक्के सदनिका गैरव्यवहार प्रकरणी प्रथम वर्ग न्यायालयानं २ वर्षे कारावास आणि १० हजार दंडाची शिक्षा सुनावली. या शिक्षेविरोधात माणिकराव कोकाटे यांनी नाशिक जिल्हा सत्र न्यायालयात धाव घेतली होती. जिल्हा सत्र न्यायालयात या प्रकरणी दोन्ही बाजूंचा युक्तिवाद संपल्यानंतर कोकाटे यांची दोन वर्षांची शिक्षा आणि १० हजाराचा दंड कायम ठेवला. नाशिक सत्र न्यायालयानं आज कोकाटे यांच्या विरोधात अटक वॉरंट बजावून त्यांना त्वरित अटक करावी, असे आदेश पोलिसांना दिले आहेत. दरम्यान माणिकराव कोकाटे प्रकरणी हायकोर्टात शुक्रवारी सुनावणी होणार आहे. वकील अनिकेत निकम यांनी अपिल करुन तातडीच्या सुनावणीसाठी विनंती केली होती. सत्र न्यायालयानं त्यांच्यावर जो अटकेचा आदेश दिला त्यावर आमची बाजू आम्हाला मांडायची आहे, असं त्यांना सांगितलं. यावर आता शुक्रवारी सुनावणी होणार आहे.
न्यायालयानं म्हटलं की, जरी ते मंत्री असले तरी सर्व नागरिक समान आहेत. न्यायालयात त्यांच्या वकिलांनी सांगितलं की, कोकाटे हे रुग्णालयात दाखल आहेत. मात्र, त्यांचा कुठलाही कागदोपत्री पुरावा देण्यात आला नाही. त्याचवेळेस सरकारी वकिलांनी न्यायालयाच्या निदर्शनास आणून दिले की, कोकाटे हे कॅबिनेट मीटिंगमध्ये होते. नगरपालिकांच्या रॅलीमध्ये होते. ते आता मंत्रालयात आहेत. त्यामुळे तब्येत खराब असल्याची लंगडी सबब न्यायालयानं अमान्य केली आहे. मुख्यमंत्र्यांनी आता तरी कोकाटे यांचा राजीनामा घ्यावा. कायद्याचे राज्य आहे, याची प्रचिती नागरिकांना येईल, असं वकील आशुतोष राठोड यांनी म्हटलं आहे.
