अहिल्यानगर : श्रीगोंदा तालुका कोळगाव शिवारातील नहेरमळा येथे अंगावर काटा आणणारी घटना उघडकीस आली आहे. रागाच्या भरात एका मातेने आपल्या ८ महिन्याच्या बाळाला ब्लँकेटमध्ये गुंडाळून विहिरीत टाकून ठार मारल्याची घटना घडली. कार्तिक योगेश दळवी असं मृत बाळाचं नाव आहे. तर सोनाली योगेश दळवी (रा नहेरमळा, कोळगाव, ता. श्रीगोंदा) असं आरोपी महिलेचे नाव असून, तिला बेलवंडी पोलिसांनी अटक केली आहे.
मिळालेल्या माहितीनुसार, २७ नोव्हेंबर रोजी दुपारी अचानक आलेल्या फोनवरून पोलिसांना माहिती मिळाली की श्रीगोंदा तालुक्यातील नहेरमळा शिवारातील सुदाम दळवी यांच्या शेतातील विहिरीत एका बाळाचा मृतदेह दिसत आहे. पोलिस निरीक्षक नंदकुमार सोनवलकर यांच्या पथकाने घटनास्थळी धाव घेतली असता 8 महिन्याचा कार्तिक विहिरीत तरंगताना आढळला. गावकऱ्यांच्या मदतीने त्याला बाहेर काढण्यात आले. सुरुवातीच्या चौकशीत कार्तिकची आई सोनाली, तसेच चुलती सुषमा आणि चुलता ज्ञानेश्वर यांनी पोलिसांना उडवाउडवीची उत्तरे दिली. त्यामुळे पोलिसांचा संशय वाढला. कठोर चौकशीत आई सोनाली हिनेच खून केल्याची कबुली दिली. ब्लँकेटमध्ये गुंडाळलं आणि विहिरीत टाकलं, अशी थरकाप उडवणारी कबुली नराधम आईने दिली, सोनालीने सांगितले की, सकाळी साडेदहा वाजताच्या सुमारास घरात कोणी नसल्याचे पाहून तिने झोळीत झोपलेल्या कार्तिकला ब्लँकेटमध्ये गुंडाळले आणि रागाच्या भरात थेट विहिरीत फेकून दिले. घटनेची माहिती मिळाल्यानंतर केवळ एका तासात हा गुन्हा उघडकीस आणला.
