मुंबई : आगामी स्थानिक स्वराज्य संस्थाच्या निवडणुकीमुळे मुंबईसह राज्यभरात राजकीय वातावरण तापलं आहे. या निवडणुकीच्या पार्श्वभूमीवर मतदारायादीतील घोळ देखील समोर येत आहे. मुंबईत काही ठिकाणी मतदारांची दुबार नावे आढळले आहेत. गेल्या काही दिवसांपासून मनसे पदाधिकारी मतदारयादीतील घोळ समोर आणत आहेत. आता मनसे पदाधिकाऱ्यांनी मतदारयादीतून मराठी भाषेलाच डावलल्याचा प्रकार समोर आणला आहे. या प्रकारामुळे मनसने आक्रमक भूमिका घेतली आहे.
मुंबईतील चारकोप विधानसभा मतदारसंघातील मतदारयादीत गुजराती, बंगाली, ओडिया भाषेत मतदारांची नावे आढळली आहे. या यादीत मराठीला डावलल्याच्या मुद्द्यावरून मनसेने आक्रमक भूमिका घेतली आहे. इतर भाषेत असलेल्या मतदारयाद्या मनसे पदाधिकाऱ्यांनी निवडणूक अधिकाऱ्यांसमोर आणल्या. महाराष्ट्रात मागील काही दिवसांपासून मतदारयाद्यांमधील घोळ उघडकीस आणण्याचे काम मनसे पक्षाकडून सुरू आहे. चारकोप मतदारसंघात सर्वाधिक घोळ मतदारयाद्यांमध्ये आढळून आला आहे. यासोबतच अनेक मतदारांची नावे मराठी ऐवजी गुजराती, बंगाली, ओडिया आणि तामिळ भाषेत देखील आढळून आल्यामुळे मनसे आक्रमक झाली आहे. मनसे चारकोप विभाग अध्यक्ष दिनेश साळवी यांनी याच मुद्द्यावर आक्रमक होत चारकोप विधानसभा निवडणूक अधिकारी कार्यालयात धडक मोर्चा काढला.
