मुंबई : राज्यात काही दिवसातच थंडीला सुरुवात होणार आहे. थंडीत अनेकजण फिरायला जाण्याचा प्लान करतात. थंडीत छान सकाळी धुक्याची चादर पसरलेली असते. यावेळी छान माथेरान, महाबळेश्वरला जाण्याचा प्लान करतात. त्यात वीकेंडला फिरायला जाण्याची मज्जा काही वेगळीच असते. मुंबई पुण्यापासून अवघ्या २ तासाच्या अंतरावर असलेल्या माथेरानला तर पर्यटक नेहमी भेट देत असतात.
दरम्यान, माथेरानला जाणाऱ्यांसाठी आनंदाची बातमी आहे. आता माथेरानची मिनी ट्रेन सुरु होणार आहे. माथेरानची मिनी ट्रेन हे पर्यटकांचे खास आकर्षण आहे. या ट्रेनचा प्रवास खूप खास असतो. या ट्रेनमधून तुम्ही पूर्ण माथेरान फिरु शकतात. दरम्यान, ही ट्रेन पावसाळ्यात बंद असते. दसऱ्याला सुरु होते. मात्र, यंदा पावसाळा ऑक्टोबर महिन्यात लांबला त्यामुळे ही ट्रेन बंद ठेवण्याचा निर्णय घेण्यात आला होता. मात्र, आता ही ट्रेन सुरु होणार आहे. १ नोव्हेंबरपासून नेरळ ते माथेरान अशी मिनिटी ट्रेन सुरु होणार आहे. नोव्हेंबरपासून माथेरानमध्ये पर्यटकांची गर्दी होण्याची शक्यता आहे. त्यामुळे ही ट्रेन सुरु केली जाणार आहे. दरम्यान, मिनी ट्रेनच्या मार्गावर कामदेखील सुरु आहे. पावसाळ्यात मिनी ट्रेनच्या मार्गावर अनेक ठिकाणी भूस्खलन झाले आहे. याचसोबत काही भागात सुरक्षा भिंत उभारण्याचे काम सुरु आहे. हे काम लवकरच पूर्ण होईल, असं सांगण्यात येत आहे. माथेरानची मिनी ट्रेन १९०७ रोजी ब्रिटीश काळात सुरु करण्यात आली होती. सर आदमजी पिरभाय यांनी ही ट्रेन सुरु केली होती. ही ट्रेन दरवर्षी पावसाळ्यात बंद होते आणि चार महिन्यांनी सुरु होते. यंदा ही ट्रेन सुरु होण्यास महिनाभर उशिर झाला आहे.
