विरार : विरारच्या गुन्हे प्रकटीकरण शाखा ३ ने कारवाई करून वसई येथून आठ कोटी किंमतीचे अमली पदार्थ जप्त केले आहे. याप्रकरणी तीन आरोपींना अटक करण्यात आली असून याप्रकरणी वालीव पोलीस ठाण्यात गुन्हा नोंदविण्यात आला आहे. विरारच्या गुन्हे प्रकटीकरण शाखा ३ ला गुरुवारी रात्री वसई पूर्वेच्या फादरवाडी परिसरात काही व्यक्ती अमली पदार्थ विक्रीसाठी घेऊन येणार असल्याची माहिती मिळाली होती.
त्यानुसार पोलिसांच्या पथकाने फादरवाडी रेंजनाका रस्त्यावरील श्रीपाल टॉवर येथे सापळा रचून कारवाई करत तिघांना अटक केली आहे. समुंदरसिंग देवडा (४९), युवराजसिंग राठोड (२८), तकतसिंग राजपूत (३८) अशी आरोपींची नावे असून हे तिघेही राजस्थान राज्यातील जोधपूर आणि सिरोही येथील रहिवासी आहेत. यावेळी आरोपींकडून ८ कोटी ४ लाख ४० हजार किंमतीचा २ किलो ११ ग्रॅम वजनाचा हेरॉईन नावाचा अमली पदार्थ आणि ५ लाख ६५ हजार किमतीची एक चारचाकी गाडी असा एकूण ८ कोटी १० लाख ५ हजार किमतीचा मुद्देमाल जप्त करण्यात आला आहे. आरोपींच्या विरोधात वालीव पोलीस ठाण्यात एनडीपीएस कायद्याअंतर्गत गुन्हा दाखल करण्यात आला असून पोलीस पुढील तपास करत आहेत. ही कारवाई विरारच्या गुन्हे शाखा कक्ष ३ चे पोलीस निरीक्षक शाहूराज रणवरे, सहाय्यक पोलीस निरीक्षक सुहास कांबळे, आदींच्या पथकाने केली.