कोल्हापूर : कोल्हापूर स्थानिक गुन्हे अन्वेषण विभागाने कुरुंदवाड येथील गोलंदाज मळा येथे घरगुती सिलेंडर गॅसमधून बेकायदेशीररित्या रिक्षामध्ये गॅस भरून देण्याचे साहित्य सापडल्याने संशयित आरोपी तोहीद परवेज गोलंदाज (रा. दत्त कॉलेज रोड, गोलंदाज मळा, कुरुंदवाड) यास मुद्देमालासह पोलिसांनी ताब्यात घेतले आहे. याची फिर्याद स्थानिक गुन्हे अन्वेषणचे पोलीस हेड कॉन्स्टेबल अबूबकर अब्दुलगणी शेख यांनी कुरुंदवाड पोलिसात दिली आहे. येथील गोलंदाज मळा या ठिकाणी तोहीद गोलंदाज यांनी घरगुती सिलेंडर गॅसमधून बेकायदेशीररित्या रिक्षामध्ये गॅस भरून देत असल्याची माहिती कोल्हापूर स्थानिक गुन्हे अन्वेषण विभागाला मिळाली होती. त्यानुसार दुपारी सव्वा बारा वाजता संशयित आरोपी गोलंदाज याच्या घरासमोरील शेड जवळ उघड्यावर पंधरा हजार रुपये किमतीचे साहित्या मिळून आले. यामध्ये पाच सीलबंद गॅस सिलेंडर, २५०० रुपये किंमतीची अर्धवट भरलेली गॅस सिलेंडर टाकी, तीन हजार पाचशे रुपये किमतीची इलेक्ट्रिक मोटर पाईप कॉक व इतर साहित्य, दोन हजार रुपये किमतीचा वजन काटा, पाचशे रुपये किमतीची पितळी नोझल, २५० रुपये किमतीची दोन पट्टी पाना असा एकूण २३ हजार ७५० रुपयांचा मुद्देमाल जप्त करण्यात आलेला आहे.
घरगुती वापराचे गॅस असलेले सिलेंडर आपल्या कब्जात बाळगून ती धोकादायक स्फोटके माहित असतानाही सुरक्षेसाठी लागणारी अग्निरोधक सामग्रीजवळ बाळगली नाही. तसेच घरगुती गॅसचा कृत्रिम तुटवडा निर्माण करून रिक्षामध्ये ८० रुपये किलोप्रमाणे बेकायदेशीर गॅस भरून मुद्देमालासह आढळून आला. त्यामुळे जीवनावश्यक वस्तू कायदा कलम अंतर्गत गुन्हा दाखल करण्यात आलेला आहे. या कारवाई पथकामध्ये स्थानिक गुन्हे अन्वेषणचे सहाय्यक पोलीस उपनिरीक्षक एस. आर. कवळेकर, सहाय्यक फौजदार एच.डी.सवतेकर, सहाय्यक फौजदार पी. एस. नरके, पोलीस हेड कॉन्स्टेबल आर. एस. जरळी, चालक पोलीस हेड कॉन्स्टेबल ए. डी . इंगवले सहभाग घेतला होता.
