पुणे : राज्यात फसवणुकीचे प्रमाण मोठ्या प्रमाणात वाढले आहे. राज्यातील वेगवेगळ्या भागातून फसवणुकीच्या घटना उघडकीस येत असतात. अशातचं आता शेअर बाजारात गुंतवणुकीवर जादा नफा देण्याच्या आमिषाने सायबर चोरट्यांनी येरवडा व कोथरूडमधील दोघांची ७० लाख रुपयांची फसवणूक केल्याचा प्रकार उघडकीस आला आहे. पहिल्या घटनेत वडगाव शेरी भागातील एकाची सायबर चोरट्यंनी शेअर बाजारात गुंतवणुकीच्या आमिषाने ४७ लाख ४३ हजारांची फसवणूक केली. याबाबत ३८ वर्षीय व्यक्तीने येरवडा पोलीस ठाण्यात तक्रार दिली आहे. त्यानुसार, चोरट्यांवर गुन्हा दाखल करण्यात आला आहे.
तक्रारादाराच्या मोबाइलवर सायबर चोरट्यांनी गेल्या वर्षी नोव्हेंबर महिन्यात मॅसेज पाठविला होता. शेअर बाजारात गुंतवणूक केल्यास चांगला नफा मिळेल, असे मॅसेजमध्ये म्हटले होते. त्यानंतर चोरट्यांच्या मोबाइलवर तक्रारदाराने संपर्क साधला. तक्रारदाराने सुरुवातीला थोडी रक्कम गुंतविली. गुंतवणुकीवर परतावा मिळाल्याने तक्रारदाराचा विश्वास बसला. त्यानंतर सायबर चोरट्यांनी त्यांना आणखी रक्कम गुंतविण्यास सांगितले. दिलेल्या बँक खात्यात तक्रारदाराने गेल्या दोन ते अडीच महिन्यात वेळोवेळी ४७ लाख ४३ हजार रुपये जमा केले. चोरट्यांनी त्यांना परतावा दिला नाही. फसवणूक झाल्याचे लक्षात आल्यानंतर त्यांनी पोलिसांकडे तक्रार दिली. गुन्हे शाखेच्या पोलीस निरीक्षक पल्लवी मेहेर तपास करत आहेत. तसेच कोथरुड भागातील एकाची सायबर चोरट्यांनी २९ लाख ३५ हजार रुपयांची फसवणूक केली. याप्रकरणी कोथरूड पोलीस ठाण्यात गुन्हा दाखल करण्यात आला असून, कोथरूड पोलीस ठाण्याचे वरिष्ठ निरीक्षक संदीप देशमाने तपास करत आहेत.
