मुंबई : महाराष्ट्र राज्य सामाईक प्रवेश परीक्षा कक्षाने (सीईटी सेल) शैक्षणिक वर्ष २०२७-२८ साठी पदवी आणि पदव्युत्तर व्यावसायिक अभ्यासक्रमांच्या प्रवेश परीक्षांचे संभाव्य वेळापत्रक जाहीर केले आहे. यंदा एकूण २१ सीईटी परीक्षा होणार असून, त्यापैकी ११ अभ्यासक्रमांसाठी विद्यार्थ्यांना दोन वेळा परीक्षा देण्याची संधी मिळणार आहे. उच्च व तंत्र शिक्षण मंत्री चंद्रकांत (दादा) पाटील यांनी ही माहिती दिली. यंदापासून पोस्ट ग्रॅज्युएट डिप्लोमा इन मॅनेजमेंट (पीजीडीएम), पोस्ट ग्रॅज्युएट सर्टिफिकेट इन मॅनेजमेंट (पीजीसीएम) आणि जनरल नर्सिंग अँड मिडवायफरी (जीएनएम) या तीन अभ्यासक्रमांसाठी प्रथमच सीईटी घेतली जाणार आहे. जानेवारीपासून परीक्षा सुरू होऊन १० जून २०२७ पर्यंत विविध सीईटी पार पडतील. मागील वर्षी २० सीईटी परीक्षांसाठी १८ लाखांहून अधिक विद्यार्थ्यांनी नोंदणी केली होती.
विद्यार्थ्यांना अधिक संधी उपलब्ध करून देण्याच्या उद्देशाने दोन वेळा परीक्षा घेण्यात येणाऱ्या अभ्यासक्रमांची संख्या तीनवरून ११ करण्यात आली आहे. पीसीएम, पीसीबी, एमबीए/एमएमएस, पीजीडीएम, पीजीसीएम, पाच वर्षीय एलएलबी, बीएचएमसीटी, बीसीए, बीबीए, बीएमएस आणि बीबीएम या अभ्यासक्रमांसाठी दोन वेळा परीक्षा घेतली जाणार असून पहिली परीक्षा देणे अनिवार्य, तर दुसरी परीक्षा ऐच्छिक असेल. दोन्ही परीक्षा दिल्यास ज्या परीक्षेत अधिक पर्सेंटाइल मिळेल, तेच गुण प्रवेशासाठी ग्राह्य धरले जाणार आहेत. संभाव्य वेळापत्रकानुसार एमबीए/एमएमएस, पीजीडीएम आणि पीजीसीएमची पहिली परीक्षा २८ ते ३० जानेवारी, तर दुसरी परीक्षा १ ते ३ एप्रिल २०२७ रोजी होईल. पाच वर्षीय एलएलबीची परीक्षा २८-२९ मार्च आणि २४ मे, पीसीबी समूहाची ८ ते १३ एप्रिल व ६ ते ८ मे, तर पीसीएम समूहाची १६ ते २६ एप्रिल आणि १० ते १५ मे दरम्यान होणार आहे. बीएचएमसीटी, बीसीए, बीबीए, बीएमएस आणि बीबीएमच्या परीक्षा २८ ते ३० एप्रिल तसेच २७ ते २८ मे रोजी होतील. याशिवाय एमएचएमसीटी, एमसीए, बी.डिझाईन, तीन वर्षीय एलएलबी, नर्सिंग, जीएनएम, एमपीएड, एमएड आणि विविध बीएड अभ्यासक्रमांच्या परीक्षाही मार्च ते जूनदरम्यान आयोजित केल्या जाणार आहेत. मात्र, तीन वर्षीय एकात्मिक बीएड-एमएड अभ्यासक्रमाची सीईटी यंदा घेतली जाणार नाही. राज्यात या अभ्यासक्रमाला अत्यल्प प्रतिसाद मिळाल्यामुळे हा निर्णय घेण्यात आला आहे. सीईटी सेलने जाहीर केलेले हे वेळापत्रक संभाव्य असून अंतिम वेळापत्रक आणि पुढील सूचनांसाठी विद्यार्थ्यांनी सीईटी सेलच्या अधिकृत संकेतस्थळावरील माहितीकडे लक्ष ठेवावे.

