मुंबई : मुंबईमधून एक मोठी बातमी समोर आली आहे. हशिश ऑईल या अंमली पदार्थाच्या तस्करी प्रकरणात दोन आरोपींना ताब्यात घेण्यात आलं आहे. त्यांच्याकडून तब्बल दोन कोटी रुपयांचे अमली पदार्थ जप्त करण्यात आले आहेत. या घटनेनं खळबळ उडाली आहे. हे दोन्ही आरोपी तामिळनाडूच्या मदूराई येथून मुंबईत आले होते. घटनेबाबत अधिक माहिती अशी की, अंमली पदार्थांची तस्करी करणाऱ्या दोन तरुणांना मुंबईतून ताब्यात घेण्यात आलं आहे. त्यांच्याकडून मोठ्याप्रमाणात हशिश ऑईलचा साठा जप्त करण्यात आला आहे. जप्त करण्यात आलेल्या अमली पदार्थाची किंमत दोन कोटी रुपये इतकी आहे. मुंबईतील तरुणांना अमली पदार्थ विकण्यासाठी दोन ड्रग पेडलर बांद्रा परिसरात येणार असल्याची माहिती आझाद मैदान युनिटला मिळाली होती. मिळालेल्या माहितीनुसार पोलिसांनी सापळा रचून आरोपींना अटक केली आहे. आनंद कुमार (३७) आणि उदय देवेंद्रन (३९) असं या प्रकरणातील आरोपींचं नाव आहे.
हशिश ऑईल हा अंमली पदार्थ गांजा या वनस्पतीच्या भागांपासून किंवा भांग/चरसच्या अर्कातून तयार केला जातो. हशिश ऑईल हे द्रव/स्थायू स्वरूपात मिळत असून, त्याचा रंग सामान्यतः पारदर्शक सोनेरी किंवा हलका तपकिरी रंग, काळसर असून, त्याचा वापर सेवनासाठी, धुम्रपानासाठी केला जातो. हशिश ऑईल धुम्रपानासाठी डबिंग उपकरण, विशेष प्रकारचा वॉटर पाईप्स, व्हेपोरायझर्स आणि व्हेप पेन याचा उपयोग केला जातो. त्याची रचना इलेक्ट्रॉनिक सिगारेट प्रमाणे असते. अंमली पदार्थ विरोधी कक्षाने २०२३ मध्ये एकूण ९९ गुन्हे दाखल केले असून यामध्ये २०८ अंमली पदार्थ तस्करांना अटक केली आहे. त्यांच्याकडून ५० कोटींपेक्षा अधिक किमतीचा मुद्देमाल जप्त करण्यात आला आहे.
