पुणे : कल्याणीनगरमध्ये घडलेल्या अपघातातील आलिशान पोर्श मोटार विनानोंदणी रस्त्यावर धावत होती. बंगळुरूमध्ये तात्पुरती नोंदणी करून पुण्यात ही मोटार आणण्यात आली. त्यानंतर एप्रिलमध्ये या मोटारीची नोंदणी करण्याची प्रक्रिया पुण्यातील प्रादेशिक परिवहन कार्यालयात (आरटीओ) सुरू करण्यात आली. परंतु, १ हजार ७५८ रुपयांचे शुल्क न भरल्याने कोट्यवधी रुपये किंमत असलेल्या या मोटारीची नोंदणी अद्याप पूर्ण झालेली नाही. कल्याणीनगरमध्ये अल्पवयीन मुलगा पोर्श मोटार चालवीत होता. तो मोटार भरधाव चालवीत असताना तिची धडक बसून दुचाकीवरील दोघांचा मृत्यू झाला होता. हा अपघात घडला त्या वेळी मोटारीला नोंदणी क्रमांक नव्हता. ही मोटार बंगळुरूमधून खरेदी करण्यात आली होती. या मोटारीची किंमत पावणेदोन ते अडीच कोटी रुपयांच्या दरम्यान आहे. तेथील वितरकाने या मोटारीची तात्पुरती नोंदणी करून ती पुण्यात पाठविली. मोटारीची तात्पुरती नोंदणी १८ मार्चला झाली होती. या नोंदणीची मुदत १७ सप्टेंबरपर्यंत वैध आहे, अशी माहिती आरटीओतील सूत्रांनी दिली.
पोर्श मोटार पुण्यात आल्यानंतर १८ एप्रिलला नोंदणीसाठी ती पुण्यातील आरटीओमध्ये नेण्यात आली. तिथे आरटीओतील निरीक्षकाने तिची तपासणी केली. त्या वेळी तिची नोंदणी प्रक्रिया सुरू करण्यात आली. या मोटारीची किंमत काही कोटी रुपयांच्या घरात असली, तरी ती इलेक्ट्रिक मोटार असल्याने नोंदणी शुल्क फारसे नाही. नोंदणीसह इतर शुल्क अशी केवळ १ हजार ७५८ रुपयांची रक्कम भरून ही नोंदणी प्रक्रिया अद्याप पूर्ण करण्यात आलेली नाही. त्यामुळे ही मोटार विनानोंदणी रस्त्यावर धावत होती, असे सूत्रांनी स्पष्ट केले.
पोर्शचे नोंदणीचे शुल्क (रुपयांत)
– बँक शुल्क – १५००
– नोंदणी प्रमाणपत्र – २००
– टपाल खर्च – ५८
– एकूण शुल्क – १७५८