पुणे : सांस्कृतिक राजधानी आणि शिक्षणाचे माहेरघर असे बिरूद मिरविणाऱ्या पुण्यात गेल्या दहा महिन्यांत १४ कोटी रुपयांचे अमली पदार्थ पोलिसांनी जप्त केले आहेत. बेसुमार नागरीकरण, स्थलांतर, चंगळवादी जीवनशैलीचे आकर्षण आणि लहान वयात मोबाइल व समाजमाध्यमांचा वाढता प्रभाव यामुळे तरुणाईमध्ये अमली पदार्थांचे आकर्षण वाढत असून, सुसंस्कृत पुणे ड्रग्जचे हब होण्याचा धोका वाढला आहे. अमली पदार्थ तस्कर ललित पाटील याच्या पलायनाच्या निमित्ताने शहरातील अमली पदार्थांची बाजारपेठ चर्चेत आली आहे. पोलिसांच्या गुन्हे शाखेच्या अमली पदार्थ विरोधी विभागाने दहा महिन्यांत ७० प्रकरणांमध्ये १४ कोटी रुपयांचे अमली पदार्थ जप्त केले आहेत. यामध्ये मेफेड्रॉन, गांजा, चरस, कोकेन, ब्राउन शुगर, अफू यासह इतर अमली पदार्थांचा समावेश आहे. याप्रकरणी सुमारे शंभर जणांना पोलिसांनी अटक केली आहे.
गेल्या काही वर्षांत शहरात अमली पदार्थांची तस्करी मोठ्या प्रमाणात वाढली आहे. अमली पदार्थांचे रॅकेट उधळण्यासाठी पोलिसांतर्फे कारवाई करण्यात येत आहे. अमली पदार्थांबद्दल जनजागृती होण्यासाठी पोलिसांतर्फे विविध उपक्रम राबविण्यात येत आहेत. पोलिस आयुक्त रितेशकुमार यांनी अमली पदार्थांची तस्करी करणाऱ्या टोळ्या आणि विक्रेत्यांवर कारवाई करण्याचे आदेश दिले आहेत. सुसंस्कृत पुण्यात एवढ्या मोठ्या प्रमाणात अमली पदार्थ कुठून येतात, असा प्रश्न नागरिकांना पडला आहे. कोंढवा, कोरेगाव पार्क, विमाननगर, पिंपरी-चिंचवड या भागांत राहणारे अनेक नायजेरियन नागरिक या तस्करीत गुंतले आहेत. आंतरराष्ट्रीय टोळ्या या स्थानिक हस्तकांमार्फत अमली पदार्थांचे रॅकेट चालवतात. शहरातील शाळा, कॉलेज, वसतिगृहे, आयटी कंपन्या या टोळ्यांनी लक्ष्य केली आहेत. नायजेरिया, घाना, राजस्थान, आंध्र प्रदेश येथून मोठ्या प्रमाणात गांजा आणि मेफेड्रोनचा पुरवठा राज्यात होतो. ललित आणि भूषण पाटील या भावांच्या उद्योगामुळे स्थानिक पातळीवरही अमली पदार्थांची मोठ्या प्रमाणात निर्मिती होत असल्याचे समोर आले. यामागे कोणाचा राजकीय वरदहस्त आहे, असा सवाल निर्माण झाला आहे.
जप्त पदार्थांचे मूल्य रुपयांत आणि कंसात गुन्ह्यांची संख्या
मेफेड्रोन : ७,९१,९९,००० (३९ )
गांजा : ३,०७, ९०,००० (५०)
एलएसडी : १,१२, ६४,००० (२)
चरस : ४८, ०२,००० (४)
अफू : ४७, ८२,००० (९)
हेरॉइन : ४६, ८९,००० (१)
अमली पदार्थांच्या तस्करीच्या प्रकरणांमध्ये यंदा ऐंशीपेक्षा जास्त जणांना अटक करण्यात आली आहे. आरोपींकडून चौदा कोटी रुपयांचे अमली पदार्थ जप्त करण्यात आले आहेत. गेल्या वर्षी ११८ आणि २०२१मध्ये ७० गुन्हे दाखल करण्यात आले होते.- अमोल झेंडे, पोलिस उपायुक्त, गुन्हे शाखा
– १० महिने
– ७० प्रकरणे
– १४ कोटी रुपयांचे अमली पदार्थ जप्त
