नवी मुंबई : नागरिकांना महापालिकेशी संबंधित सेवा अधिक सुलभ, जलद आणि पारदर्शकपणे उपलब्ध करून देण्यासाठी नवी मुंबई महानगरपालिकेने डिजिटल सेवांचा मोठ्या प्रमाणावर विस्तार केला आहे. सध्या महापालिकेच्या ६८ लोकसेवा थेट ऑनलाइन उपलब्ध करून देण्यात आल्या असून, यासोबतच आणखी ४९ इतर सेवा डिजिटल माध्यमातून सुरू करण्यात आल्या आहेत. त्यामुळे एकूण ११७ सेवा नागरिकांसाठी ‘एका क्लिकवर’ उपलब्ध झाल्या आहेत.
नागरिकांना विविध कामांसाठी वारंवार महापालिका कार्यालयात येण्याची गरज पडू नये, या उद्देशाने हा उपक्रम राबविण्यात येत आहे. याकडे महापालिका आयुक्त डॉ. कैलास शिंदे यांनी विशेष लक्ष दिले आहे. नागरिक http://www.nmmc.gov.in या अधिकृत संकेतस्थळावरून तसेच ‘माझी नवी मुंबई – My NMMC’ या मोबाईल ॲपच्या माध्यमातून या सेवांचा लाभ घेऊ शकतात. रुग्णालयात होणाऱ्या जन्म व मृत्यूच्या घटनांची नोंद संबंधित रुग्णालयांनी ऑनलाइन पद्धतीने महापालिकेकडे करणे बंधनकारक करण्यात आले आहे. यासाठी https://dc.crsorgi.gov.in या विशेष संगणक प्रणालीचा वापर केला जात असून, नोंदणी करताना आवश्यक कागदपत्रे अपलोड करणे, तसेच संबंधित व्यक्तीचा ई-मेल आयडी व मोबाइल क्रमांक नोंदवणे अनिवार्य आहे. रुग्णालयांकडून प्राप्त झालेल्या ऑनलाइन अर्जांची संबंधित विभाग कार्यालय स्तरावर छाननी केली जाते. त्यानंतर विहित शुल्क आकारून तीन दिवसांच्या आत जन्म किंवा मृत्यू प्रमाणपत्र वितरित करण्यात येते. या ऑनलाइन सेवांमध्ये जन्म नोंदणी व मृत्यू नोंदणी या अत्यावश्यक सेवांचा समावेश आहे. महापालिकेने २०२४ पासून जन्म आणि मृत्यू प्रमाणपत्रे ऑनलाइन देण्यास सुरुवात केली असून, अर्ज केल्यानंतर अवघ्या तीन दिवसांत प्रमाणपत्र उपलब्ध करून देण्यात येत आहे. जानेवारी ते डिसेंबर २०२५ या कालावधीत एकूण १६,९०२ जन्म प्रमाणपत्रांचे ऑनलाइन वितरण करण्यात आले असून, ही सर्व प्रमाणपत्रे शासनाने ठरवून दिलेल्या कालमर्यादेत दिल्याची माहिती महापालिकेने दिली.
