नवी मुंबई : अज्ञात चोराने नेरूळमध्ये राहणाऱ्या जीएसटी आयुक्तांच्या रो-हाऊसच्या खिडकीचे लोखंडी ग्रील तोडून त्यांच्या रो-हाऊसमधील सोन्या-चांदीच्या दागिन्यांसह रोख रक्कम व आयफोन असा दोन लाख ९२ हजार रुपये किमतीचा ऐवज चोरून नेल्याची घटना उघडकीस आली आहे. नेरूळ पोलिसांनी या प्रकरणातील अज्ञात चोराविरोधात घरफोडीचा गुन्हा दाखल करून त्यांचा शोध सुरू केला आहे. नेरूळ सेक्टर १७मधील रो-हाऊसमध्ये कुटुंबासह राहणारे बिधान चंद्रा शर्मा (५७) हे चेन्नई येथे जीएसटी आयुक्त म्हणून कार्यरत आहेत. त्यांची दोन्ही मुले नोकरीनिमित्त चेन्नई येथे आहेत. बिधान चंद्रा हेदेखील काही महिन्यांपासून चेन्नई येथेच राहण्यास आहेत. त्यांची पत्नी नेरूळ येथे राहण्यास असून त्या अधुनमधून चेन्नई येथे जात असतात. बिधान चंद्रा यांची पत्नी नेरूळमधील घर बंद करून चेन्नई येथे गेल्या होत्या.
त्यानंतर बिधान चंद्रा हे चेन्नई येथून नेरूळ येथील घरी येणार असल्याने त्यांनी घरकाम करणाऱ्या महिलेला सांगून तिला घराची स्वच्छता करण्यास संगितले होते. त्यानंतर ३० जून रोजी बुधान चंद्र हे पत्नीसह रात्री १० वाजता घरी पोहोचल्यानंतर घरातील पहिल्या मजल्यावरील बेडरूममधील कपाटातील सोन्याचांदीचे दागिने, रोख रक्कम व आयफोन असा दोन लाख ९२ हजार रुपये किमतीचा ऐवज चोरीला गेल्याचे निदर्शनास आले. त्यानंतर त्यांनी नेरूळ पोलिस ठाण्यात तक्रार दाखल केली.
