पॅरिस : टेनिस विश्वातला सम्राट असलेल्या नोव्हाक जोकोव्हिचने फ्रेंच खुल्या टेनिस स्पर्धेचे जेतेपद पटकावले. जोकोव्हिचने यावेळी प्रतिस्पर्धी कॅस्पन रूडला धुळ चारली आणि जेतेपदावर नाव कोरले. हे जेतेपद जिंकत त्याने इतिहास रचला आहे. कारण आता त्याच्या नावावर तब्बल २३ ग्रँडस्लॅम जेतपदं झाली आहेत.या अंतिम सामन्याचा पहिला सेट चांगलाच रंगला होता. कारण यावेळी जोकोव्हिचला रुडने कडवी झुंज दिल्याचे पाहायला मिळाले. बिनतोड सर्व्हिस यावेळी पहिल्या सेटमध्ये पाहायला मिळाली. एकिकडे जोकोव्हिच दमदार खेळी करत होता, तर दुसरीकडे कॅस्पर हा त्याला चांगलेच झुंजवत होता. हा सामान एकतर्फी होईल, असे बऱ्याच जणांना वाटले होते. पण यावेळी कॅस्परने नोव्हाकला चांगली लढत दिली. त्यामुळे पहिला सेट हा बरोबरीत असल्याचे दिसत होते. दोघेही आपली सर्व्हिस जिंकत होते आणि एक एक सेट जिंकत होते. त्यामुळे पहिल्या सेटमध्ये ६-६ अशी बरोबरी झाली होती. त्यामुळे आता टाय ब्रेकरवर सर्वांचे लक्ष लागले होते. पण या टाय ब्रेकरमध्ये नोव्हाकने आपला अनुभव पणाला लावला, त्याने हा टाय ब्रेकर ७-१ असा सहजपणे जिंकला आणि त्याचबरोबर पहिला सेट ७-६ असा आपल्या खिशात टाकला.
पहिल्या सेटमध्ये विजय मिळवल्यावर नोव्हाकचे मनोबल उंचावलेले पाहायला मिळाले. कारण दुसऱ्या सेटमध्ये त्याने कॅस्परपेक्षा दमदार कामगिरी केली. त्यामुळे नोव्हाकला हा दुसरा सेट ६-३ असा सहजपणे जिंकता आला. या सामन्यात नोव्हाकने २-० अशी आघाडी घेतली होती. ज्यापद्धतीने त्याने दुसरा सेट जिंकला ते पाहता तो आता तिसरा सेट सहज जिंकून जेतेपद पटकावेल, असे वाटत होते. पण कॅस्पर काही हार मानणारा नव्हता. कॅस्परने यावेळी तिसऱ्या सेटमध्ये दमदार कमबॅक केले आणि तिसऱ्या सेटमध्ये त्याने आघाडीही घेतली होती. नोव्हाकच्या हातून हा सेट निसटणार, असे वाटत होते. हे नोव्हाकच्या लक्षात आले आणि त्याने आक्रमक खेळ करायला सुरुवात केली. त्यामुळे त्याला या सेटमध्ये ५-५ अशी बरोबर साधता आली. पण त्यानंतर त्याने ७-५ अशी मजल मारली व जेतेपद पटकावले.