पिंपरी : मुख्यमंत्री कार्यालयातून बोलत असल्याचे सांगून शहरातील मोठ्या महाविद्यालयांमध्ये प्रवेश मिळवून देणाच्या बहाण्याने पैसे उकळणाऱ्या एकाला पिंपरी-चिंचवड पोलिसांच्या गुन्हे शाखेने अटक केली. या आरोपीने पुणे आणि पिंपरी-चिंचवड शहरांतील अनेक मोठ्या महाविद्यालयांची फसवणूक केली आहे. राहुल राजेंद्र पलांडे (वय ३१, रा. दर्शननगरी, केशवनगर, चिंचवड) असे अटक करण्यात आलेल्याचे नाव आहे. या प्रकरणी मुख्यमंत्री कार्यालयातील लिपिकाने हिंजवडी पोलिस ठाण्यात फिर्याद दिली आहे. पोलिसांनी सांगितले, ‘राहुल पलांडेच्या फेसबुक वॉलवर मुख्यमंत्री एकनाथ शिंदे यांच्यासह मंत्री उदय सामंत, माजी मुख्यमंत्री उद्धव ठाकरे, खासदार संजय राऊत, अनेक कॅबिनेट मंत्री यांच्याबरोबरचे फोटो आहेत. पलांडे याने त्याच्या तीन ते चार मोबाइल फोन नंबरपैकी काही नंबरला ‘ट्रू कॉलर’वर सीएमओ ऑफिस, महाराष्ट्र शासन, मुंबई असे सेव्ह केले होते. त्यामुळे त्याने फोन केल्यास मुख्यमंत्री कार्यालयातून फोन आला असे वाटत असे. त्याचबरोबर पलांडे याने व्हॉट्स ॲप डीपीवर सरकारचे बोधचिन्ह ठेवले होते. या सगळ्या गोष्टींमुळे तो सरकारी अधिकारी आणि लोकसेवक असल्याचे भासवत होता. विद्यार्थ्यांकडून आणि त्यांच्या पालकांकडून पैसे घेऊन पुणे आणि पिंपरी चिंचवड शहरातील हिंजवडी, लवळे, पुणे आणि बंगळूर येथे सिम्बायोसिस आणि डी. वाय. पाटील कॉलेजमध्ये चार प्रवेश मिळवून देण्यासाठी पलांडे हा मुख्यमंत्री कार्यालयातून बोलत असल्याचे भासवित होता.
दोन दिवसांपूर्वी शहरातील एका विवाह सोहळ्याला मुख्यमंत्री एकनाथ शिंदे, अनेक मंत्री आणि बहुसंख्य कॉलेजचे संस्थापक, चालक उपस्थित होते. त्या वेळी मुख्यमंत्री कार्यालयातील बडे अधिकारी आणि कॉलेज व्यवस्थापनाचे विश्वस्त समोरासमोर आल्यानंतर पलांडे याने फोनद्वारे केलेल्या विनंतीवरून प्रवेश दिल्याचे समोर आले. मात्र, मंत्रालयातील कोणत्याही अधिकाऱ्याने कोणत्याही कॉलेज व्यवस्थापनाला फोन केला नसल्याचे उघड झाले. पलांडे याने बनावट पत्र तयार करून त्या आधारे लोकांकडून पैसे घेऊन हा प्रकार केल्याचे उघड झाले. त्यानंतर मुख्यमंत्री कार्यालयातील अधिकाऱ्यांनी पिंपरी-चिंचवडमध्ये येऊन फिर्याद दिली. त्यानंतर अवघ्या काही तासांत पोलिसांनी राहुल पलांडेला अटक केली. न्यायालयाने त्याची रवानगी २९ तारखेपर्यंत पोलिस कोठडीत केली आहे. दरम्यान, पलांडे याचे मंत्रालय आणि शहरातील बडे राजकीय नेते, कॉलेज व्यवस्थापन आदी लोकांशी सातत्याने फोन वरून संभाषण होत असल्याचे प्राथमिक तपासातून समोर आले आहे. पिंपरी-चिंचवड गुन्हे शाखा या प्रकरणाचा तपास करीत आहे.
