मुंबई : मुंबईतील कायदा व सुव्यवस्था अबाधित राखण्यासाठी बृहन्मुंबई पोलीस आयुक्तालयाच्या हद्दीत २५ ऑक्टोबर २०२६ पर्यंत जमावबंदी आदेश लागू करण्यात आला आहे. महाराष्ट्र पोलीस अधिनियम, १९५१ अंतर्गत प्राप्त अधिकारांचा वापर करून पोलीस उपायुक्त (अभियान) यांनी हा आदेश जारी केला आहे. आदेशानुसार सार्वजनिक ठिकाणी पाच किंवा त्यापेक्षा अधिक व्यक्तींनी एकत्र जमण्यावर निर्बंध घालण्यात आले असून, परवानगीशिवाय मिरवणुका काढणे, ध्वनीवर्धक किंवा संगीत बँडचा वापर करणे तसेच फटाके फोडण्यासही बंदी घालण्यात आली आहे. त्यामुळे सार्वजनिक कार्यक्रम, मिरवणुका किंवा अन्य सामूहिक उपक्रमांचे आयोजन करणाऱ्यांनी लागू असलेल्या नियमांचे पालन करणे आवश्यक आहे. मुंबई पोलिसांनी नागरिकांना शांतता आणि सुव्यवस्था राखण्यासाठी प्रशासनाला सहकार्य करण्याचे आवाहन केले आहे.
तथापि, या आदेशातून काही कार्यक्रमांना सूट देण्यात आली आहे. विवाह समारंभ, विवाहाशी संबंधित धार्मिक विधी आणि अंत्यसंस्कार यांना जमावबंदी लागू होणार नाही. तसेच कंपन्या, सहकारी संस्था आणि विविध संघटनांच्या कायदेशीर बैठका, क्लबमधील कार्यक्रम, सामाजिक मेळावे आणि संस्थांच्या नियमित कामकाजाशी संबंधित उपक्रमांनाही सूट देण्यात आली आहे. चित्रपटगृहे, नाट्यगृहे, सार्वजनिक मनोरंजनाची ठिकाणे, न्यायालये, सरकारी व निमसरकारी कार्यालये, शाळा, महाविद्यालये आणि इतर शैक्षणिक संस्थांमधील नियमित कामकाज पूर्ववत सुरू राहणार आहे. याशिवाय कंपन्या, कारखाने, दुकाने आणि इतर व्यावसायिक आस्थापनांमधील नियमित व्यापार-व्यवसायासाठी होणाऱ्या जमावालाही परवानगी असेल. पोलिसांची पूर्वपरवानगी घेऊन शांततापूर्ण पद्धतीने काढण्यात येणाऱ्या मोर्चांनाही या आदेशातून वगळण्यात आले आहे. पोलीस उपायुक्त (अभियान) अकबर पठाण यांनी नागरिकांना सार्वजनिक ठिकाणी वावरताना लागू असलेल्या निर्बंधांची माहिती घेऊन त्यांचे काटेकोरपणे पालन करण्याचे आवाहन केले आहे.
