पार्थ पवार-कायनात दारा यांचा पुण्यात साखरपुडा; राजकीय दिग्गजांच्या उपस्थितीत पार पडला कौटुंबिक सोहळा

पुणे : उपमुख्यमंत्री सुनेत्रा पवार यांचे सुपुत्र आणि राज्यसभा खासदार पार्थ पवार यांचा कायनात दारा यांच्याशी २९ जुलै २०२६ रोजी पुण्यातील ‘द रिट्स-कार्लटन’ या पंचतारांकित हॉटेलमध्ये साखरपुडा पार पडला. हा सोहळा अत्यंत साध्या, कौटुंबिक आणि मर्यादित स्वरूपात आयोजित करण्यात आला होता. मोजके नातेवाईक, निकटवर्तीय आणि विशेष निमंत्रितांच्या उपस्थितीत झालेल्या या कार्यक्रमात पवार कुटुंब एकत्र आल्याचे पाहायला मिळाले. समारंभात अनेक भावनिक क्षणही अनुभवायला मिळाले. काही छायाचित्रांमध्ये सुनेत्रा पवार भावुक झाल्याचे आणि त्यांच्या डोळ्यांत अश्रू तरळल्याचे दिसून आले. या सोहळ्यात दिवंगत नेत्यांची उणीव अनेकांना जाणवली. साखरपुड्याच्या कार्यक्रमाला राष्ट्रवादी काँग्रेसचे अध्यक्ष शरद पवार यांच्यासह मुख्यमंत्री देवेंद्र फडणवीस, उपमुख्यमंत्री एकनाथ शिंदे, प्रफुल्ल पटेल आणि विविध राजकीय क्षेत्रातील अनेक मान्यवरांनी उपस्थित राहून नवदाम्पत्याला शुभेच्छा दिल्या. साधेपणा आणि कौटुंबिक वातावरण असूनही या सोहळ्याकडे राज्याच्या राजकीय वर्तुळाचे विशेष लक्ष लागले होते. विविध पक्षांतील नेत्यांची उपस्थिती आणि पवार कुटुंबातील सदस्यांचा सहभाग यामुळे हा समारंभ चर्चेचा विषय ठरला.

कायनात दारा या मूळच्या पंजाबमधील चंदीगड येथील असून सध्या त्या नवी दिल्लीत वास्तव्यास आहेत. त्यांनी दिल्लीतील ‘द ब्रिटिश स्कूल’मधून शालेय शिक्षण पूर्ण केले असून, त्यानंतर लंडनमधील ‘लंडन स्कूल ऑफ इकॉनॉमिक्स’ (LSE) येथून उच्च शिक्षण घेतले आहे. शिक्षण पूर्ण झाल्यानंतर त्यांनी ‘NDTV’ या इंग्रजी वृत्तवाहिनीमध्ये आउटपुट एडिटर आणि रिपोर्टर म्हणून काम केले. सध्या त्या आपल्या कुटुंबाच्या रिअल इस्टेट आणि हॉस्पिटॅलिटी व्यवसायात सक्रिय भूमिका बजावत आहेत. कायनात दारा आणि पवार कुटुंबामध्ये पूर्वीपासूनच जिव्हाळ्याचे कौटुंबिक संबंध असल्याचे सांगितले जाते. यापूर्वीही त्या पार्थ पवार यांच्यासोबत विविध सार्वजनिक कार्यक्रमांमध्ये दिसल्या आहेत. काही महिन्यांपूर्वी पार्थ पवार आणि कायनात दारा यांनी मध्य प्रदेशातील प्रसिद्ध महाकाल मंदिरात एकत्र दर्शन घेतले होते. आता साखरपुड्यानंतर त्यांच्या विवाहाचीही तारीख निश्चित झाली असून, पार्थ पवार आणि कायनात दारा यांचा विवाह सोहळा २७ फेब्रुवारी २०२७ रोजी बारामती येथे पार पडणार आहे. त्यामुळे आगामी काळात या विवाह सोहळ्याकडेही राजकीय, सामाजिक आणि सार्वजनिक क्षेत्रातील अनेकांचे लक्ष लागले आहे.