मुंबई : दूरदर्शन, सोशल मीडिया आणि विविध डिजिटल माध्यमांवर प्रसिद्ध होणाऱ्या उत्पादनांच्या जाहिरातींमधून ग्राहकांची दिशाभूल करणाऱ्या कंपन्या आणि त्या जाहिरातींमध्ये सहभागी होणाऱ्या सेलिब्रिटींवर आता कठोर कारवाई करण्यात येणार असल्याचा स्पष्ट इशारा अन्न व औषध प्रशासन विभागाचे आयुक्त तुकाराम मुंढे यांनी दिला आहे. उत्पादनांची सत्यता, गुणवत्ता किंवा कायदेशीर मान्यता न तपासता केवळ आर्थिक मोबदल्यासाठी करण्यात येणाऱ्या दिशाभूल करणाऱ्या जाहिराती हा कायद्याने गुन्हा असून, अशा प्रकरणांमध्ये कोणालाही सूट दिली जाणार नाही, असे त्यांनी स्पष्ट केले. कायदा सर्वांसाठी समान आहे आणि जाहिरात करणारी व्यक्ती कितीही मोठी अभिनेता, अभिनेत्री किंवा सेलिब्रिटी असली तरी तिच्यावरही तितकीच जबाबदारी राहील, असे त्यांनी ठामपणे सांगितले. अन्न व औषध प्रशासन तसेच भारतीय अन्न सुरक्षा आणि मानक प्राधिकरण (FSSAI) अंतर्गत अशा जाहिरातींवर कारवाई करण्याची स्पष्ट तरतूद असून, नियमांचे उल्लंघन करणाऱ्यांविरुद्ध कायदेशीर पावले उचलली जातील. FSSAI च्या त्रैमासिक बैठकीत देशभरातील अन्न व औषध प्रशासनाच्या आयुक्तांना दिशाभूल करणाऱ्या जाहिरातींवर कठोर कारवाई करण्याचे स्पष्ट निर्देश देण्यात आल्याची माहितीही मुंढे यांनी ‘मुंबई तक’शी बोलताना दिली. त्यांनी सांगितले की, ग्राहकांची फसवणूक करणाऱ्या जाहिराती कोणत्याही परिस्थितीत सहन केल्या जाणार नाहीत आणि अशा प्रकरणांमध्ये कायद्याची काटेकोर अंमलबजावणी केली जाईल.
तुकाराम मुंढे यांनी स्पष्ट केले की, यापुढे केवळ उत्पादन तयार करणाऱ्या कंपन्यांनाच नव्हे, तर त्या उत्पादनांची जाहिरात करणाऱ्या सेलिब्रिटींनाही तितकेच जबाबदार धरले जाईल. कोणत्याही उत्पादनाची जाहिरात स्वीकारण्यापूर्वी संबंधित उत्पादन FSSAI च्या निकषांनुसार मान्यताप्राप्त आहे का, त्याची गुणवत्ता आणि दावे सत्य आहेत का, याची खात्री करणे आवश्यक असल्याचे त्यांनी सांगितले. उत्पादनामध्ये दोष, चुकीची माहिती किंवा ग्राहकांची दिशाभूल करणारे दावे आढळल्यास मूळ कंपनीसोबतच जाहिरात करणाऱ्या अभिनेता, अभिनेत्री, मॉडेल किंवा अन्य प्रसिद्ध व्यक्तीवरही कायदेशीर कारवाई केली जाईल, असे त्यांनी स्पष्ट केले. कारवाईच्या वेळी “मी फक्त जाहिरात केली”, “माझा उत्पादनाशी संबंध नाही” किंवा “करारात वेगळ्या अटी होत्या” अशी कारणे ग्राह्य धरली जाणार नाहीत. संबंधित व्यक्तीने दिशाभूल करणाऱ्या जाहिरातीत सहभाग घेतला असेल, तर कायद्यानुसार तिच्यावरही कारवाई होणारच, असे त्यांनी ठाम शब्दांत सांगितले. मुंढे यांच्या या स्पष्ट भूमिकेमुळे जाहिरात क्षेत्र आणि मनोरंजन विश्वात मोठी खळबळ उडण्याची शक्यता व्यक्त केली जात आहे. यापूर्वी अनेक सेलिब्रिटी केवळ जाहिरातीच्या करारापुरती जबाबदारी स्वीकारत असत; मात्र आता उत्पादनाच्या विश्वासार्हतेबाबतही अधिक दक्षता घेणे त्यांच्यासाठी आवश्यक ठरणार असल्याचे या भूमिकेतून स्पष्ट झाले आहे.
