वृत्तसंस्था : बॉलिवूड अभिनेता राजपाल यादव यांना चेक बाऊन्स प्रकरणात दिल्ली उच्च न्यायालयाने दोषी ठरवत तीन महिन्यांच्या साध्या कारावासाची शिक्षा सुनावली आहे. निगोशिएबल इन्स्ट्रुमेंट्स अॅक्टच्या कलम १३८ अंतर्गत दाखल करण्यात आलेल्या सात स्वतंत्र प्रकरणांमध्ये न्यायालयाने हा निर्णय दिला. न्यायालयाने प्रत्येक प्रकरणात तक्रारदाराला १.०५ कोटी रुपयांची नुकसानभरपाई देण्याचे आदेश दिले आहेत. तसेच प्रत्येक प्रकरणात अतिरिक्त १.०४ लाख रुपये आणि ७५ हजार रुपये तक्रारदाराला, तर २५ हजार रुपये राज्य सरकारकडे जमा करण्याचे निर्देशही दिले आहेत. हे प्रकरण एम/एस मुरली प्रोजेक्ट्स प्रायव्हेट लिमिटेड या कंपनीने दाखल केलेल्या तक्रारीशी संबंधित आहे. कंपनीने दिलेल्या तक्रारीनुसार, राजपाल यादव यांनी दिलेले धनादेश (चेक) वटले नसल्याने कंपनीने न्यायालयात दाद मागितली होती. त्यानंतर या प्रकरणाची सुनावणी विविध न्यायालयांत झाली आणि अखेरीस दिल्ली उच्च न्यायालयाने अंतिम निर्णय देत त्यांना दोषी ठरवले. या निकालामुळे चेक बाऊन्स प्रकरणात आर्थिक व्यवहारांतील जबाबदारी आणि न्यायालयीन आदेशांचे पालन करण्याचे महत्त्व पुन्हा अधोरेखित झाले आहे.
या प्रकरणात यापूर्वीही राजपाल यादव यांच्याविरोधात न्यायालयाने निर्णय दिला होता. मे २०२४ मध्ये सत्र न्यायालयाने त्यांना सहा महिन्यांच्या कारावासाची शिक्षा सुनावली होती. त्यानंतर त्यांनी दिल्ली उच्च न्यायालयात अपील दाखल केले. अपीलच्या सुनावणीदरम्यान त्यांच्या वकिलांनी तक्रारदारासोबत तडजोड होईल, असे न्यायालयाला सांगितल्यानंतर उच्च न्यायालयाने शिक्षेला तात्पुरती स्थगिती देत प्रकरण मध्यस्थीकडे पाठवले होते. सुनावणीदरम्यान न्यायालयाने नमूद केले की, राजपाल यादव यांनी तक्रारदाराला २.५ कोटी रुपये हप्त्यांमध्ये अदा करण्याचे आश्वासन दिले होते. मात्र, अनेक संधी देऊनही त्यांनी ते पूर्ण केले नाही. त्यामुळे फेब्रुवारी २०२६ मध्ये न्यायालयाने त्यांना शरण येण्याचे आदेश दिले आणि आणखी मुदत देण्याची त्यांची विनंती फेटाळून लावली. त्यानंतर ५ फेब्रुवारी २०२६ रोजी त्यांनी न्यायालयासमोर आत्मसमर्पण केले. पुढे त्यांनी तक्रारदाराकडे १.५ कोटी रुपये जमा केल्यानंतर न्यायालयाने त्यांना काही प्रमाणात अंतरिम दिलासा दिला होता. मात्र, अंतिम सुनावणीनंतर दिल्ली उच्च न्यायालयाने तीन महिन्यांच्या साध्या कारावासाची शिक्षा कायम ठेवत नुकसानभरपाईची रक्कम भरण्याचे आदेश दिले आहेत.
