मुंबई : अन्न व औषध प्रशासन (एफडीए) विभागावर गेल्या काही महिन्यांपासून भ्रष्टाचार आणि अनियमिततेचे आरोप होत होते. या पार्श्वभूमीवर राज्य सरकारने २५ मे रोजी आयएएस अधिकारी तुकाराम मुंढे यांच्याकडे विभागाची जबाबदारी सोपवली. पदभार स्वीकारल्यानंतर त्यांनी प्रशासनात पारदर्शकता, उत्तरदायित्व आणि कडक शिस्त आणण्यासाठी विविध उपाययोजना राबविण्यास सुरुवात केली आहे. सार्वजनिक आरोग्याशी संबंधित प्रश्नांवर प्रभावी नियंत्रण ठेवण्यासाठी तसेच बेकायदेशीर कारवायांवर लगाम घालण्यासाठी त्यांनी थेट नागरिकांच्या सहभागाला प्राधान्य दिले आहे. विभागाच्या कामकाजात अधिक पारदर्शकता निर्माण करण्याबरोबरच तक्रारींवर तातडीने कारवाई करण्यासाठी स्वतंत्र संपर्क यंत्रणा उभारण्याचा निर्णय घेण्यात आला आहे. त्यामुळे नागरिकांना त्यांच्या परिसरात सुरू असलेल्या गैरप्रकारांची माहिती थेट प्रशासनापर्यंत पोहोचविणे अधिक सुलभ होणार आहे.
भेसळयुक्त अन्नपदार्थ, बनावट औषधे तसेच प्रतिबंधित गुटखा आणि पान मसाल्याच्या विक्रीबाबत नागरिक आता थेट एफडीए आयुक्तांकडे तक्रार नोंदवू शकतात. यासाठी विभागाने 1800-222-365 हा टोल-फ्री हेल्पलाईन क्रमांक आणि jc-foodhq@gov.in हा अधिकृत ई-मेल आयडी जाहीर केला आहे. या माध्यमातून प्राप्त होणाऱ्या तक्रारींची दखल घेऊन संबंधितांवर योग्य ती कारवाई केली जाणार असल्याचे विभागाने स्पष्ट केले आहे. सार्वजनिक आरोग्याला धोका निर्माण करणाऱ्या कोणत्याही व्यक्ती, संस्था किंवा व्यावसायिकांची गय केली जाणार नाही, असा स्पष्ट इशारा तुकाराम मुंढे यांनी दिला आहे. तसेच नागरिकांनी आपल्या परिसरात सुरू असलेल्या अन्न व औषध भेसळीच्या, बनावट औषधांच्या किंवा प्रतिबंधित पदार्थांच्या बेकायदेशीर विक्रीबाबत न घाबरता प्रशासनाला माहिती द्यावी, असे आवाहन एफडीएकडून करण्यात आले आहे. माहिती देणाऱ्या व्यक्तीची ओळख पूर्णपणे गोपनीय ठेवली जाईल, अशी हमीही विभागाने दिली असून नागरिकांच्या सहकार्यामुळे अशा गैरप्रकारांवर अधिक प्रभावीपणे नियंत्रण मिळवता येईल, असा विश्वास व्यक्त करण्यात आला आहे.
