ठाणे : राज्यातील आयपीएस अधिकाऱ्यांच्या बदल्यांचे सत्र सुरू असून ठाणे शहर पोलीस आयुक्तालय आणि ठाणे ग्रामीण पोलीस दलात यापूर्वी काम केलेल्या अनेक अनुभवी अधिकाऱ्यांची पुन्हा एकदा ठाणे जिल्ह्यात नियुक्ती करण्यात आली आहे. या बदल्यांमध्ये पंजाबराव उगले, बाळासाहेब पाटील आणि विनयकुमार राठोड यांचा समावेश आहे. तर ठाणे शहर पोलीस दलातील आयपीएस अधिकारी श्रीकांत परोपकरी, सुभाष बुरसे तसेच ठाणे ग्रामीणचे पोलीस अधीक्षक डी.एस. स्वामी इतर विभागात बदली करण्यात आली आहे. उपमुख्यमंत्री एकनाथ शिंदे हे पालकमंत्री असलेल्या ठाणे जिल्ह्यात नियुक्तीसाठी अनेक वरिष्ठ अधिकाऱ्यांमध्ये रस्सीखेच सुरू होती. अखेर राज्य शासनाने बदल्यांचे आदेश जारी करत ठाणे पोलीस दलात अनुभवी अधिकाऱ्यांना पुन्हा संधी दिली आहे. ठाणे गुन्हे अन्वेषण शाखेत अपर पोलीस आयुक्त म्हणून काम पाहिलेले पंजाबराव उगले यांची नुकतीच पोलीस गृहनिर्माण आणि कल्याण महामंडळाच्या विशेष पोलीस महानिरीक्षकपदी नियुक्ती झाली होती. मात्र आता त्यांची पुन्हा ठाणे पोलीस दलात बदली करण्यात आली आहे.
नाशिक ग्रामीणचे पोलीस अधीक्षक म्हणून कार्यरत असलेले बाळासाहेब पाटील यांची यापूर्वी मुंबई पोलीस दलात उपायुक्तपदी नियुक्ती झाली होती. आता त्यांची बदली ठाणे शहर पोलीस आयुक्तालयात उपायुक्त म्हणून करण्यात आली आहे. नाशिक ग्रामीणमध्ये रुजू होण्यापूर्वी त्यांनी ठाणे शहर पोलीस दलाच्या वाहतूक विभागात उपायुक्त म्हणून जबाबदारी सांभाळली होती. तसेच छत्रपती संभाजीनगर ग्रामीणचे पोलीस अधीक्षक विनयकुमार राठोड यांचीही ठाणे ग्रामीण पोलीस अधीक्षकपदी नियुक्ती करण्यात आली आहे. त्यांनी यापूर्वी ठाणे शहर पोलीस दलाच्या वाहतूक शाखेचे उपायुक्त म्हणून काम पाहिले होते. दरम्यान, नागपूर शहरचे अपर पोलीस आयुक्त शिवाजी राठोड यांची ठाणे शहर पोलीस दलात अपर पोलीस आयुक्तपदी, तर राज्य राखीव पोलीस दलाचे उपमहानिरीक्षक अशोक दुधे यांचीही अपर पोलीस आयुक्तपदी नियुक्ती करण्यात आली आहे. दुसरीकडे, पोलीस उपायुक्त श्रीकांत परोपकारी यांची राज्य गुप्तवार्ता विभागाच्या सागरी सुरक्षा उपायुक्तपदी, तर परिमंडळ एकचे उपायुक्त सुभाष बुरसे यांची राज्य गुप्तवार्ता विभागात उपायुक्तपदी बदली करण्यात आली आहे.
