नागपूर (सतीश भालेराव) : महाराष्ट्र वनविभागातील १२,९९१ अस्थायी वनसेवकांच्या नियमितीकरणासाठी आणि कर्मचारी-अधिकाऱ्यांवरील अन्यायाविरुद्ध आता नवा संघर्ष उभा राहत आहे. ‘महाराष्ट्र वन कर्मचारी-अधिकारी दक्षता सेना’ या नव्या संघटनेची भव्य राज्यस्तरीय स्थापना सभा येत्या ७ फेब्रुवारी २०२६ रोजी गोंदिया येथे होणार आहे.
या सभेत राज्यातील अकरा वनवृत्तांमधील प्रादेशिक, वन्यजीव, सामाजिक वनीकरण आणि एफडीसीएम विभागातील कर्मचारी-अधिकारी मोठ्या संख्येने सहभागी होणार आहेत. वनविभागातील वाढता भ्रष्टाचार, कर्मचाऱ्यांवरील अन्याय-अत्याचार आणि प्रलंबित असलेले अस्थायी पदांचे नियमितीकरण या मुद्द्यांवर ठोस भूमिका जाहीर केली जाणार आहे. संघटनेचे प्रवक्ते सचिन गायकवाड भारतीय यांनी सांगितले की, “आमची संघटना भ्रष्टाचारावर ‘दक्षतेचा डोळा’ ठेवेल आणि अन्यायाविरुद्ध ‘मशाल’ पेटवून न्याय मिळवून देईल.” यावेळी संघटनेच्या अधिकृत लोगोचे अनावरण होणार असून त्यामध्ये डोळा, मशाल आणि वाघ अशी प्रतीके असतील.
