मुंबई : नववर्षाच्या स्वागतासाठी प्रशासनाकडून प्रवाशांसाठी विविध उपाययोजना राबवण्यात येत आहेत. मुंबई लोकलनंतर आता BEST कडूनही थर्टी फर्स्टच्या रात्री प्रवाशांसाठी विशेष बससेवा सुरू करण्यात येणार आहे. ३१ डिसेंबरच्या रात्री मुंबईकरांचा प्रवास अधिक सुखकर व्हावा, यासाठी ही सुविधा उपलब्ध करून देण्यात आली आहे. थर्टी फर्स्टच्या रात्री गेट वे ऑफ इंडिया, जुहू चौपाटी, गोराई खाडी आणि मारवे चौपाटी याठिकाणी मोठ्या प्रमाणात नागरिकांची गर्दी होते. हीच बाब लक्षात घेऊन या ठिकाणांसाठी विशेष बससेवा चालवण्यात येणार आहे. BEST कडून नियमित मार्ग क्रमांक C-86, 203 आणि 231 तसेच वातानुकूलित मार्ग क्रमांक A-21, A-112, A-116, A-247, A-272 आणि A-294 वर अतिरिक्त बसगाड्या धावणार आहेत. या विशेष बसेस ३१ डिसेंबरच्या रात्री १० ते मध्यरात्री १२.३० वाजेपर्यंत सोडण्यात येणार आहेत. त्यामुळे नववर्ष साजरे करून प्रवाशांना सुरक्षित आणि आरामदायी प्रवासाने घरी परतता येणार आहे.
याशिवाय, BESTची लोकप्रिय Heritage Tour बस सेवा देखील थर्टी फर्स्टच्या दिवशी सुरू ठेवण्यात येणार आहे. BESTने दिलेल्या माहितीनुसार, बुधवारी ३१ डिसेंबर रोजी सायंकाळी ५.३० वाजता ही सेवा सुरू होणार असून, गुरुवारी १ जानेवारी २०२६ च्या पहाटेपर्यंत ती सुरू राहणार आहे. उत्सवकाळात खासगी वाहनांमुळे मोठ्या प्रमाणात वाहतूक कोंडी होते. अशा वेळी सार्वजनिक वाहतुकीचा वापर केल्यास ही कोंडी कमी होण्यास मदत होईल. त्यामुळे ३१ डिसेंबरच्या रात्री प्रवाशांनी BESTच्या या विशेष सेवांचा लाभ घ्यावा, असे आवाहन करण्यात आले आहे.
