सातारा : महाराष्ट्राचं नंदनवन समजल्या जाणाऱ्या पाचगणीमध्ये ५ लाखांचं १३ ग्रॅम कोकेन जप्त करण्यात आल्यानं पर्यटन क्षेत्रात खळबळ माजली आहे. याप्रकरणी १० जणांना ताब्यात घेण्यात आलं असून कोकेनसह महागड्या स्कोडा आणि एमजी हेक्टर गाड्या, मोबाईल, असा ४२ लाख ८५ हजार रुपये किंमतीचा मुद्देमाल जप्त करण्यात आला आहे. जावळी तालुक्यातील सावरी गावात एमडी ड्रग्जची फॅक्टरी उध्वस्त करण्यात आल्याची घटना ताजी असतानाच पाचगणीत कोकेन विक्री करणारं रॅकेट पोलिसांच्या हाती लागलं आहे.
कोकेन तस्करी प्रकरणी महंमद नावेद सलिम परमार (रा. भेंडी बाजार, मुंबई), सोहेल हशद खान (रा. पी.बी. मार्ग, मुंबई), महंमद रिजवान अन्सारी, वासिल हमीद खान, अली अजगर सादिक राजकोटवाला (रा. नागपाडा, मुंबई), महंमद साहिल अन्सारी (रा.शिलाजी टॉवर, मुंबई सेन्ट्रल), जिशान इरफान शेख (रा. भायखळा, मुंबई), सैफ अली कुरेशी (रा. मज्जीद गल्ली, मुंबई), महंमद उबेद सिद्दिकी (रा. भेंडीबजार, मुंबई), राहिद मुख्तार शेख (रा. ग्रॅन्ट रोड, मुंबई) यांना ताब्यात घेतले. सर्व संशयित हे मुंबईतील रेकॉर्डवरचे गुन्हेगार आहेत. सातारा स्थानिक गुन्हे शाखा आणि पाचगणी पोलिसांनी ही संयुक्त कारवाई केली असल्याची माहिती पोलीस अधीक्षक तुषार दोशी यांनी दिली आहे.
